Memlekettik qyzmetshiniń ant mátini jańartylady
ASTANA. KAZINFORM — Memlekettik organdarda jańadan Profılaktıka qyzmeti qurylady. Bul týraly búgin Qyzylordada Memlekettik qyzmet isteri agenttiginiń bastamasymen ótken Ádep jónindegi ýákilderdiń respýblıkalyq forýmynda belgili boldy.
Іs-sharaǵa Memlekettik qyzmet isteri agenttiginiń tóraǵasy Darhan Jazyqbaı, Qyzylorda oblysynyń ákimi Nurlybek Nálibaev, ortalyq jáne jergilikti atqarýshy organdardyń ádep jónindegi ýákilderi, memlekettik qyzmetshiler jáne memlekettik qyzmet ardagerleri qatysty.
Forýmnyń negizgi maqsaty — Memleket basshysynyń bastamasymen júzege asyrylyp jatqan «Ádiletti Qazaqstan», «Adal azamat» qaǵıdattaryn ilgeriletip, memlekettik qyzmetshiler arasynda Zań men tártiptiń ornyǵýyna aıryqsha yqpal etý. Munda ásirese Ádep jónindegi ýákilderge erekshe jaýapkershilik júkteledi.
Іs-sharanyń ashylýynda Darhan Jazyqbaı Memleket basshysynyń Qazaqstan halqyna Joldaýynda aıtqan: «Zań jáne tártip» — memleketimizdiń myzǵymas tuǵyry. Qoǵamda osy qaǵıdany túbegeıli ornyqtyrý úshin barlyq quzyrly organdar arasynda ortaq kózqaras pen ortaq ustanym bolýǵa tıis. Bul — eń aldymen, eshqandaı quqyq buzýshylyqqa jol bermeý qaǵıdasy, ıaǵnı kez kelgen zańsyzdyqqa qarsy turý degen ustanym. Sondyqtan memlekettik organdardyń osy baǵyttaǵy jumysyn barynsha qoldaý qajet. Sonda ǵana elimizde quqyq buzýshylyqqa, ozbyrlyq pen zorlyq-zombylyqqa qarsy sana-sezim qalyptasady, qoǵamǵa jat kez kelgen áreketke tózbeýshilik paıda bolady», degen sózderin tilge tıek etip, «Zań jáne tártip» qaǵıdaty memlekettik qyzmetshilerden bastaý alý kerektigin atap ótti.
Agenttik tóraǵasynyń aıtýynsha, memlekettik organdarda jańadan Profılaktıka qyzmetin qurý kózdelip otyr. Onyń negizgi mindetteri — jemqorlyqtyń aldyn alý jóninde sharalar qabyldaýdy qamtamasyz etý, memlekettik qyzmetterdiń sapasyna ishki baqylaýdy júzege asyrý, vedomstvolyq baǵynysty uıymdarynyń qyzmetin, onyń ishinde komplaens-qyzmetterdiń qyzmetin úılestirý.
Sondaı-aq, erekshe nazar aýdaratyn mańyzdy ózgeristerdiń biri — qyzmettik tergep-tekserý rásimderiniń ınstıtýtsıonaldyq túrde qaıta qurylýy. Bul rette kadr qyzmetteri ózderiniń negizgi mindeti — personaldy damytý men tıimdi kadrlyq saıasatty júrgizýge baǵyttalsa, qyzmettik tergep-tekserý jumystaryn uıymdastyrý jáne júrgizý ókilettigi tolyqtaı Profılaktıka qyzmetine beriledi. Bul ózgerister jańa zań jobasynda naqty qarastyrylyp, ony iske asyrý barysynda Ádep jónindegi ýákilder jetekshilik ról atqarady. Olar agenttiktiń ókilderi retinde memlekettik organdarǵa issaparǵa jiberiledi.
Sonymen qatar, forýmda jańartylǵan ant mátini de talqylandy. Jańartylǵan anttyń basty mindeti — memlekettik qyzmetshini tek quqyqtyq ǵana emes, sondaı-aq moraldyq mindetter de júktelgen memlekettiń ókili retinde aıqyndaý.
Darhan Jazyqbaı «Ádiletti Qazaqstan — adal azamat» qaǵıdattaryn memlekettik apparat jumysynda bekem ornyqtyrý — strategııalyq mańyzdy mindet ekenin aıtty. Memlekettik qyzmetshiler osy ustanymdardy basshylyqqa alyp, ony qoǵam sanasyna sińirýge belsendi atsalysýy tıis. Bul rette olardyń qumar oıyndarǵa qatysýyn, tyıym salynǵan zattardy qoldaný sııaqty buzýshylyqtardy boldyrmaý, sondaı-aq adaldyq qaǵıdatyna negizdelgen jemqorlyqqa qarsy mádenıetti qalyptastyrýǵa erekshe nazar aýdarý qajet. Sonymen qatar, otbasylyq qundylyqtardy saqtaý da mańyzdy basymdyqtardyń biri bolyp qala bermek.
Aıta ketý kerek bıylǵy jyldyń birinshi jartysynda qumar oıyndarǵa qatysty sybaılas jemqorlyqqa qarsy shekteýlerdi saqtamaǵan 25 memlekettik qyzmetshi anyqtalyp, zańnama talaptaryna sáıkes qyzmetinen bosatyldy.
Forýmǵa qatysýshylar Ádep jónindegi ýákilderdiń derbestigin kúsheıtýge jáne olarǵa júkteletin mindetterdi tıimdi oryndaý tetikterine qatysty oılaryn ortaǵa saldy.
Qazirgi tańda respýblıka boıynsha memlekettik organdarda 770 Ádep jónindegi ýákil qyzmet atqarady.
Buǵan deıin qumar oıyndarǵa qatysy bar 25 memlekettik qyzmetshi jumystan shyǵarylǵanyn jazǵan edik.