Memlekettik qyzmetker, býhgalter, muǵalim: Kentaýda alaıaqtarǵa kimder kóp aldanady

TÚRKІSTAN. KAZINFORM — Jyl basynan beri shaǵyn qalada 48 alaıaqtyq qylmysy tirkelgen.

Ótken jyldyń sáıkes kezeńimen salystyrǵan Kentaý qalasynda alaıaqtyq qylmysy eki esege ósip otyr. Máselen, 2024 jyldyń eki aıynda qalada 24 alaıaqtyq qylmysy tirkelse, bıyl bul kórsetkish 48-ge ósken. Alaıaqtyq qurbandarynyń jas mólsheri orta eseppen 50 jasty quraıdy. Al, jábirlenýshilerdiń kópshiligi áıel azamattar. Al, mamandyǵyna oraı saralaıtyn bolsaq, memlekettik qyzmetkerler, býhgalterler, zeınetkerler men jeke kásipkerler jáne muǵalimder alaıaqtardyń qurbany bolǵan. Sondaı-aq, bul tizimde jumyssyz azamattarda bar. Jalpy bir jyl ishinde 80 mln teńge shyǵyn kelgen. 

Búgin qalada «Alaıaqtyqqa aldanbańyz!» atty is shara ótti. Onda qala ákimi Jandos Tasov ınternet alaıaqtyqtyń jasalý joldaryn aıtyp, qorǵaný joldaryn túsindirdi. Atqarylyp jatqan jumystar jaıynda málimet berdi. 

Jıynǵa Túrkistan oblysy ekonomıkalyq tergep tekserý departamenti aǵa jedel ýákili Muhamedalı Nysanbek, qala prokýrorynyń orynbasary Bekjan Balqybekov, qalalyq polıtsııa bólimi basshysynyń birinshi orynbasary Azamat Sarsenqulov qatysyp, kópshilikti qarjylyq pıramıdalar men ózge de kúmándi ınvestıtsııalyq jobalarǵa qarjy salmaýǵa shaqyrdy. Al, bank ókilderi men halyqqa qyzmet kórsetý ortalyǵynyń mamandary áleýmettik jelige qujat júktemeý, jeke elektrondy kiltterdi eshkimge bermeý kerektigin túsindirdi.

Erkin formatta ótken basqosýda ınternet alaıaqtyqtyń aldyn alý baǵytynda vıdeo rolık kórsetildi.

Aıta keteıik, budan buryn kentaýlyq kelinshek et satýshylardy 20 mıllınon teńgege aldap ketkenin jazǵan bolatynbyz.