Memlekettik bilim berý granttary taǵaıyndaldy

ASTANA. KAZINFORM – 2025–2026 oqý jylyna arnalǵan memlekettik bilim berý granttaryn taǵaıyndaý jónindegi Respýblıkalyq komıssııa óz jumysyn aıaqtady. Bul týraly Ǵylym jáne joǵary bilim mınıstri Saıasat Nurbek áleýmettik jelidegi paraqshasynda jazdy.

Onyń aıtýynsha, komıssııa quramynda QR Parlamenti depýtattary, memlekettik organdar, bilim berý salasyndaǵy kásipodaqtar, «Atameken» UKP, joǵary oqý oryndary qaýymdastyǵy men qoǵamdyq uıym ókilderi boldy. Komıssııa otyrystarynda úmitkerlerdiń ótinishteri qaralyp, memlekettik granttar qoldanystaǵy erejelerge sáıkes konkýrs negizinde bólingen.

«Sapaly jáne qajyrly qyzmeti úshin komıssııa múshelerine sheksiz alǵysymdy bildiremin!» – dep jazdy mınıstr.

Mınıstrdiń málimetinshe, bıyl konkýrsqa qatysý úshin shamamen 113 myń ótinish qabyldanǵan. Talapkerler arasynda eń suranysqa ıe bilim berý baǵyttary retinde «Pedagogıkalyq ǵylymdar», «Injenerlik, óńdeý jáne qurylys salalary», sondaı-aq «Aqparattyq-kommýnıkatsııalyq tehnologııalar» atalǵan.

Grant taǵaıyndaý konkýrsynyń nátıjeleri Ǵylym jáne joǵary bilim mınıstrliginiń jáne Ulttyq testileý ortalyǵynyń resmı saıttarynda jáne áleýmettik jelilerde jarııalanady.

Joǵary oqý oryndaryna talapkerlerdi qabyldaý 2025 jylǵy 25 tamyzǵa deıin aıaqtalýy tıis.

Aıta keteıik, 25 shildede tamyz aıyndaǵy UBT-ǵa qatysýǵa ótinishter qabyldaý bastalady.