Reınjınırıng nátıjesinde ǵylymı saladaǵy bıznes-protsester tıimdiligi 70%-ǵa artty
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Úkimet otyrysynda ǵylymı salany tsıfrlandyrý boıynsha júrgizilip jatqan jumystar týraly baıandady.
Qazirgi ýaqytta ǵylym salasynda memlekettik qyzmettiń 12 túri kórsetiledi, barlyǵyn onlaın formatta alýǵa bolady.
2024 jyldyń qorytyndysy boıynsha 15 myńnan astam memlekettik qyzmet, onyń 95%-y elektrondyq formatta kórsetilgen.
Tsıfrlyq transformatsııa sheńberinde eń kóp suranysqa ıe 19 bıznes-protseske reınjınırıng júrgizildi. Osynyń nátıjesinde kelesi protsesterdi jetildirýge múmkindik týdy:
• ǵylymı zertteýlerdi qarjylandyrý (baǵdarlamalyq-nysanaly, granttyq qarjylandyrý, sondaı-aq kommertsııalandyrý)
• ǵylymı jáne/nemese ǵylymı-tehnıkalyq qyzmet sýbektilerin akkredıtteý týraly kýálikter berý
• ǵalymdardy yntalandyrý, mysaly, ǵylym salasyndaǵy syılyqtar men stıpendııalar.
Mınıstr reınjınırıng nátıjesinde bıznes-protsesterdiń tıimdiligi 70%-ǵa óskenin aıtty.
- Mysaly, buryn akkredıtteý týraly kýálik alý nemese syılyqaqy men stıpendııaǵa ótinim berý úshin Úkimettiń azamattarǵa arnalǵan aýmaqtyq bólimshelerine nemese Mınıstrliktiń keńsesine jeke júginý qajet bolatyn. Protsess kóptegen qujatty talap etetin jáne mekemelerdiń jumys kestesine baılanysty boldy. Endi ótinimderdi berý onlaın rejıminde júzege asyrylady, sonyń nátıjesinde tolyq avtomattandyrý kezinde ótinimderdi qaraý merzimi 15 kúnge deıin qysqardy. Sondaı-aq, biz qaǵaz sertıfıkattar men kýrerlik qyzmetterdi tolyǵymen alyp tastadyq, bul memlekettik bıýdjetti 150 mln teńgege deıin únemdeýge múmkindik berdi. Osylaısha, ótinish berý protsesi yńǵaıly bola bastady, bıýrokratııalyq júkteme tómendedi jáne qujattardy qaraý merzimi aıtarlyqtaı qysqardy. «Ulttyq ınnovatsııalyq júıeniń bir terezesin» astanahub.com bazasynda iske qostyq, — dedi mınıstr.
Bul - negizinen eGov-tyń analogi, biraq ınnovatsııalyq jáne ǵylymı qoǵamdastyq bir jerde memlekettik qoldaýdyń barlyq negizgi sharalaryna qol jetkize alatyn ınnovatorlarǵa arnalǵan tereze. Ulttyq ınnovatsııalyq júıeniń bir terezesi ǵalymdar, startaptar jáne bıznes qoldaý alyp, bir tsıfrlyq platformada tıimdi ózara árekettesý úshin sheshimder usynady.
Astana Hub ekojúıesinde deep tech salasynda ónimderdi damytatyn jáne aıtarlyqtaı ǵylymı bazasy bar startaptar qalyptasty. Keıbir kompanııalar óz ázirlemelerin monetızatsııaǵa sátti shyǵaryp, 10,6 mlrd teńgeden astam tabys taýyp, júzdegen jumys oryndaryn qurdy.
Barlyq protsesterdi «Ulttyq ınnovatsııalyq júıeniń bir terezesi» arqyly tsıfrlandyrý jáne naqty ýaqyt rejıminde tıimdilikti baqylaý jáne taldaý úshin jasandy ıntellekt agentin engizý usynylady. Bul tásil ashyqtyqty arttyrady, eseptilikti jeńildetedi jáne barlyq qatysýshylar arasynda ashyq básekelestikke yqpal ete otyryp, qarjylandyrýdyń teń sharttaryn qamtamasyz etedi.
Aıta ketsek, Premer-Mınıstr Oljas Bektenov Úkimet otyrysynda ǵylymdy tsıfrlandyrý baǵytynda birqatar tapsyrma berdi.