Memlekettiń ekonomıkaǵa shamadan tys aralasýyn shekteý kásipkerlikti damytady - Oljas Qudaıbergenov

NUR-SULTAN. QazAqparat – Memlekettiń ekonomıkaǵa shekten tys aralasýynan bas tartý kásipkerlikti damytý úshin jasalyp jatyr. Mundaı paıymdy Prezıdenttiń Qazaqstan halqyna arnaǵan Joldaýyna qatysty pikir bildirgen ekonomıst Oljas Qudaıbergenov bildirdi, dep habarlaıdy QazAqparat tilshisi.

«Memlekettiń ekonomıkaǵa shamadan tys aralasýyn shekteý - álemdik tájirıbe. Memleket ózi taýardy óndirýden nemese jeke kompanııalar kórsete alatyn qyzmetterdi berýden bas tartady. Bul kásipkerlikti damytý úshin jasalyp jatyr. Bizde ishki ulttyq ónimdegi memlekettiń úlesi onyń úshten birin quraıdy. Al damyǵan memleketterde bul kórsetkish óte tómen - 5-10 paıyzdan aspaıdy», - dedi eknomıst.

Prezıdent óz Joldaýynda shaǵyn jáne orta bıznesti qarjylandyrý úshin aqsha jetpeı jatqanda, bankterde trıllıondaǵan qarajat ekonomıkaǵa esh paıdasyz jatqanyn málimdep edi. Osy oraıda, Oljas Qudaıbergenov bankterde jatqan qomaqty somalardy bızneske baǵyttaý kásipkerlikti qoldaý úshin ekonomıkadaǵy negatıvti faktordyń birin joıýǵa yqpal etetinin aıtty.

«Negizi bul másele sońǵy 15 jyl boıy sheshilmeı keledi. 2008 jyly bolǵan daǵdarystan keıin bankter nesıe berýden bas tartady. Depozıtke aqsha jınap, artyq qarjyny notalardy satyp ala otyryp, Ulttyq bankke qaıtaryp jatyr. Qazir nesıe portfeli men ishki ulttyq ónim kórestkishi 20 paıyzǵa jetpeıdi. Bul árıne durys emes. Endi bul aqshany ekonomıkaǵa kuıyp, ony ınvestıtsııa kózi etýdiń birneshe ádisteri bar. Ony Ulttyq bank biledi. Degenmen ol ınflıatsııa bolady dep istegisi kelmeıdi. Inflıatsııa onsyz da bolyp jatyr. Sondyqtan qazir bizdiń ekonomıka eki faktordan qysym kórip otyr. Sonyń bireýin sheshsek, ekinshisin de júıege keltirýge bolady», - dep pikir bildirdi Oljas Qudaıbergenov.

Sarapshy Memleket basshysy kótergen elektr energııasy baǵytyndaǵy «Tarıfti ınvestıtsııaǵa aıyrbastaý» saıasatyna kóshý bastamasy júıeli júrgizilýi tıis ekenine toqtaldy. Onyń aıtýynsha, Qazaqstannyń elektr stantsııalary 2009-2015 jyldar aralyǵynda da osyndaı qaǵıdamen jumys istegen. Alaıda, ol kezeńde baǵdarlama nátıjesiz bolǵan. Saldarynan jańa jylý elektr stantsııalary iske qosylmaǵan, qoldanysta bary jóndeý kórmegen. Oljas Qudaıbergenovtiń málimdeýinshe, ol ýaqytta bul salaǵa baǵyttalǵan ınvestıtsııa da tıisti deńgeıde qadalanǵanbaǵan.