Memlekettik JOO-larda endaýment-qor qurý múmkindigi paıda boldy

NUR-SULTAN. QazAqparat - Elimizdiń memlekettik joǵary oqý oryndarynda endaýment-qor qurý múmkindigi paıda boldy. Bul jaıynda Senat depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Búgingi tańda 28 memlekettik joǵary oqý orny 100 paıyz memleket qatysatyn kommertsııalyq emes aktsıonerlik qoǵam (budan ári – KeAQ) bolyp qaıta quryldy. Bıyl KeAQ-qa Nazarbaev Ýnıversıtetiniń tájirıbesi boıynsha basqarýshylyq derbestik berildi. Barlyq KeAQ-tyń jarǵylary bekitildi, Dırektorlar keńesteri quryldy. Olardyń quramyna Bilim jáne ǵylym mınıstrliginiń memlekettik múlik, bıznes jónindegi ýákiletti organnyń, sondaı-aq prezıdenttik jastar kadry rezerviniń ókilderi kirdi. Budan basqa, Nazarbaev Ýnıversıtetiniń tájirıbesi boıynsha KeAQ-ta akademııalyq komıtetter, sapany qamtamasyz etý jónindegi komıtetter, ınstıtýttar, mektepter jáne taǵy basqalary qurylady. Budan ári Dırektorlar keńesiniń strategııalyq josparlaý, kadrlar jáne syıaqylar, ishki aýdıt jónindegi komıtetteri bekitiletin bolady», - dedi Asqar Mamın.

Úkimet basshysynyń paıymynsha, bul ózgerister JOO-nyń óz qyzmetiniń nátıjeleri úshin áleýmettik jaýapkershiligin arttyrýǵa, mamandardy daıarlaý sapasyn jaqsartýǵa baǵyttalǵan.

«Ýnıversıtetter bıýdjetten tys qarjylandyrý kózderi esebinen ǵylymı bilim berý qyzmeti jónindegi zańdy tulǵalardy qura alady. Startap kompanııalar ashyp, jarǵylyq qyzmetti júzege asyrý úshin qosymsha qarjy jáne materıaldyq qarajat kózderin tartady. Shet memleketterde fılıaldar qura alady. KeAQ-qa kóshken soń ýnıversıtetterde endaýment-qor qurý múmkindigi paıda boldy. Onyń ınvestıtsııalyq tabysy ǵylymı jáne (nemese) bilim berý qyzmetin qarjylandyrýǵa, bilim alýshylarǵa, ǵalymdarǵa stıpendııa tóleýge baǵyttalady. Qazirgi ýaqytta joǵary oqý oryndary damýdyń jańa strategııalyq josparlaryn, uıymdyq qurylymyn, shtat sanyn jáne taǵy basqalaryn ázirlep, bekitýde», - dedi Premer-Mınıstr.