«Memlekettik tý - táýelsizdiktiń mańyzdy nyshany» - respýblıkalyq basylymdarǵa sholý
***
«Keshe elordadaǵy «Atameken» etnomemorıaldy kesheninde Qazaqstan Prezıdenti Nursultan Nazarbaevtyń qatysýymen jyl saıynǵy qalyptasqan dástúr boıynsha Memlekettik týdy kóterýdiń saltanatty rásimi ótti», - dep jazady «Egemen Qazaqstan» gazeti búgingi sanyndaǵy «Memlekettik tý - táýelsizdiktiń mańyzdy nyshany» degen taqyryptaǵy maqalasynda. Basylymnyń atap ótýinshe, elimizdiń Kók Týy óziniń bıik tuǵyryna kóterilip, elorda kóginde jelbiregennen keıin Elbasy jınalǵan qaýymnyń aldynda sóz sóılep, Astana kúnimen quttyqtady. «Men osydan 20 jyl buryn Memlekettik tý týraly Jarlyqqa qol qoıǵan edim. Sol ýaqyttan beri Tý - bizdiń Táýelsizdigimizdiń mańyzdy atrıbýtyna aınaldy. Bıyl bas qalamyzdyń Saryarqanyń keń dalasynan ózine laıyqty ornyn tapqanyna 15 jyl tolady. Sonan bergi az ýaqytta elordamyz ózindik dástúrin qalyptastyrdy. Eldiń eń mereıli meıramdarynyń biri - Astana kúni. Osynyń qarsańynda qalamyzdyń kógine qanatyn kún súıgen qyran beıneli baıraǵymyzdy kóterý dástúrimizge aınaldy», - dedi Memleket basshysy.
Keshe Astanada Elbasy Nursultan Nazarbaevtyń qatysýymen jedel shahmat jáne blıts boıynsha álem chempıonattarynyń resmı túrde ashylý saltanaty ótti. Onyń ashylý rásimine, sondaı-aq, Astana kúnin merekeleýge arnaıy kelgen Qyrǵyz Respýblıkasynyń Prezıdenti Almazbek Atambaev, Halyqaralyq shahmat federatsııasynyń prezıdenti Kırsan Ilıýmjınov qatysty. Osy jaıt arqaý bolǵan maqala «Egemen Qazaqstan» gazetinde «Astanada shahmat akademııasy ashylady» degen taqyryppen berilgen. Basylymnyń jazýynsha, Memleket basshysy aldaǵy ýaqytta elimizde shahmat mektebin qalyptastyryp, al Astanany shahmat astanasy jasaýǵa jumys isteletinin atap ótti. Sonymen qatar bolashaqta Astanada Shahmat akademııasy men mektebi, saraıy salynatynyn málim etken.
***
«Kazahstanskaıa pravda» gazetiniń jazýynsha, keshe Elbasy Nursultan Nazarbaev Qazaqstanǵa jumys saparymen kelgen Qyrǵyz Respýblıkasynyń Prezıdenti Almazbek Atambaevpen kezdesti. Kezdesý barysynda taraptar saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyqty damytý máselesin, sondaı-aq Túrkitildes memleketterdiń yntymaqtastyq keńesiniń aıasynda ózara is-qımyl basymdyǵyn talqylady. Bıyl Qazaqstan Respýblıkasy men Qyrǵyz Respýblıkasy arasynda dıplomatııalyq qatynastardyń ornaǵanyna 20 jyl tolady. Búginde Qazaqstan Qyrǵyzstan ekonomıkasynyń iri ınvestory jáne jetekshi syrtqy saýda seriktesteriniń biri bolyp qala beredi. 2011 jyly eki el arasyndaǵy taýar aınalymy 750 mıllıon AQSh dollary deńgeıine jetti. 2012 jyldyń qańtar-sáýirinde bul kórsetkish, ótken jyldyń tıisti kezeńimen salystyrǵanda, 34 paıyzǵa artyp, 281 mıllıon AQSh dollaryn qurady.
***
«Ekspress K» gazetiniń jazýynsha, Japonııada 2011 jyldyń naýryzynda oryn alǵan «Fýkýsıma-1» atom stansasyndaǵy apattyń shyǵý sebebin tekserýge arnalǵan parlamenttik komıssııanyń qorytyndy baıandamasy usynyldy. Qujat avtorlarynyń paıymynsha, apat adamı faktorlardyń saldarynan oryn alǵan. Atap aıtqanda, el úkimeti men atom energetıka salasyna qadaǵalý jasaıtyn organ, sonymen qatar Terso stansasynyń operator kompanııasy synǵa ushyrady. Baıandamany jasaýshylardyń paıymynsha, olar jaýapkershiliksiz is-áreket jasap, sonyń saldarynan adamdar men qoǵam zardap shekti.
***
«Elorda kúnine oraı Ońtústik Qazaqstan oblysynda elimizdegi birinshi relsti avtobýs jolǵa shyqty», - dep jazady «Lıter» gazeti. Basylymnyń atap ótýinshe, Shymkent-Túrkistan baǵytymen qatynaıtyn zamanaýı jaıly poıyz relsi avtobýs dep atalady. Bul oblys úshin áleýmettik turǵyda óte mańyzdy baǵyt. Óıtkeni osy joldyń boıynda 55 myń adam turatyn 19 eldi meken ornalasqan. Kez kelgen azamat eki qala arasyna ne bári 277 teńgege tólep, 3,5 saǵattyń ishinde qatynaı alady.
