«Memlekettik til – Táýelsizdik sımvoly»: ózge ult jastary arasynda respýblıkalyq baıqaý máresine jetti

NUR-SULTAN. QazAqparat - El táýelsizdiginiń 30 jyldyǵy aıasynda «Memlekettik til – Táýelsizdik sımvoly» taqyrybymen onlaın formatta ótken respýblıkalyq baıqaý máresine jetti, dep habarlaıdy QazAqparat.

Ózge ult jastary arasynda qazaq tiliniń qoldanys aıasyn keńeıtý, qazaq tiliniń etnosaralyq qarym-qatynas tili retindegi qyzmetin nyǵaıtý jáne memlekettik tildi meńgergen qoǵamdyq belsendi ózge ult jastaryn yntalandyrýdy maqsat etken sharaǵa respýblıkanyń 14 oblysy men Nur-Sultan, Almaty, Shymkent qalalarynan iriktelgen úzdikter qatysty.

Memlekettik tildi rýhanı-mádenı qundylyq retinde dáriptegen 21-35 jas aralyǵyndaǵy qoǵamdyq belsendi etnos jastary memlekettik tildi damytýǵa qosqan úlesteri, bilim, mádenıet, sport salasyndaǵy jetistikteri baıandalǵan beınerolık usynyp, berilgen taqyrypta oı tolǵady jáne «Meniń táýelsiz Qazaqstanym» taqyrybynda esse jazdy.

Baıqaýǵa qatysýshylardyń tildi meńgerý deńgeıin, jaýaptarynyń mazmundylyǵy men ereksheligin, qazaq tilinde taza sóıleýin baǵalaǵan bilikti ádilqazylardyń sheshimimen Irýbaeva Anastasııa (Aqmola oblysy) Bas júldeni ıelendi.

І orynǵa Adıhanbaeva Mýattar (Túrkistan oblysy), ІІ orynǵa Abdýhamıdova Hýrmatoı (Shymkent qalasy) laıyq dep tanyldy.

Al Potanın Andreı (Nur-Sultan qalasy) men Checheneva Irına (Atyraý oblysy) ІІІ-oryndy teńdeı bólisti.

Almaty qalasy men Shyǵys Qazaqstan oblysynyń úmitterin arqalaǵan Dýrachenko Galına men Ibragımova Ravana yntalandyrý syılyqtarymen marapattaldy.

Memlekettik tildi ultaralyq qatynas tiline aınaldyrýǵa baǵyttalǵan sharalar kesheni odan ári jalǵasa beretin bolady.