Memlekettik organdardyń fýnktsııalaryn básekeles ortaǵa berý júıeli túrde júrgiziledi - Súleımenov

ASTANA. QazAqparat - Memlekettik organdardyń fýnktsııalaryn básekeles ortaǵa berý júıeli túrde júrgiziledi. Bul týraly búgin Úkimettiń selektorlyq rejimdegi otyrysynda «QR-nyń keıbir zańnamalyq aktilerine memlekettik fýnktsııalardy básekeles ortaǵa berý máseleleri boıynsha ózgerister men tolyqtyrýlar engizý týraly» zań jobasyn tanystyrǵan elimizdiń Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Zań jobasy «100 naqty qadam» Ult josparynyń 97-qadamyn iske asyrý úshin ázirlengen. Ult josparynyń 97-qadamyna sáıkes ózin-ózi retteýdi damytý arqyly azamattardyń sheshimder qabyldaý protsesine qatysý múmkindigin keńeıtý jáne memleketke tán emes qyzmetterdi básekelestik ortaǵa jáne ózin-ózi retteıtin uıymdarǵa berý kózdelgen Zań jobasy Qazaqstan Respýblıkasy Parlamentiniń Májilisine aǵymdaǵy jylǵy qyrkúıekte engizilýi tıis», -  dedi ol.

Onyń aıtýynsha, zań jobasy aıasynda kózdelgen túzetýlerdi shartty túrde 2 bólikke bólýge bolady. Birinshi, bul memlekettik fýnktsııalardy básekeles ortaǵa berýdiń negizgi tásilderin bekitý. Ekinshi, QR Premer-Mınıstri orynbasarynyń basshylyǵymen Úkimettiń janyndaǵy arnaıy komıssııa jumysynyń nátıjeleri boıynsha belgili bir fýnktsııalardy berý boıynsha ózgertý.

«Bazalyq tásilderdi bekitý úshin zań jobasynda mynalar aıqyndalǵan: Memlekettik organdardyń fýnktsııalaryn básekeles ortaǵa berýdiń maqsattary, qaǵıdattary men ádisteri; fýnktsııalardy irikteý jáne berýdiń ólshemsharttary men algorıtmi; fýnktsııalardy júzege asyrý sapasyn monıtorıngileý jáne sapasyz iske asyrylǵan jaǵdaıda olardy qaıtarý tetigi; Úkimet pen memlekettik organdardyń ókilettikteri, «Atameken» ulttyq kásipkerler palatasynyń roli; fýnktsııalardy oryndaýshylardyń jáne áleýetti oryndaýshylardyń quqyqtary men mindetteri; sondaı-aq arnaıy qurylǵan Úkimet janyndaǵy Komıssııanyń memlekettik fýnktsııalardy básekeles ortaǵa berý jónindegi fýnktsııalary. Keıbir fýnktsııalardy básekeles ortaǵa berý qarastyrylmaıtynyn aıta ketý kerek. Olar negizinen ulttyq, aqparattyq qaýipsizdik, qorǵanys jáne qoǵamdyq tártipti qorǵaýǵa jáne taǵy basqa salalarǵa baǵyttalǵan», -  dedi Tımýr Súleımenov.

Mınıstrdiń sózine qaraǵanda, memlekettik organdardyń fýnktsııalaryn básekeles ortaǵa berý jyl saıynǵy negizde júıeli túrde júrgiziletin bolady.

«Búgin biz usynyp otyrǵan algorıtm 7 negizgi kezeńnen turady. Birinshi jáne ekinshi kezeńde básekeles ortaǵa berýge usynylǵan memlekettik organdardyń fýnktsııalaryn irikteý jáne aldyn ala tizimdi maquldaý júrgiziledi. Úshinshi kezeńde talqylaý júrgiziledi. Bul UKP men UEM-niń resmı ınternet-resýrstarynda fýnktsııalardyń bastapqy tizilimin ornalastyrý arqyly júzege asyrylatyn bolady. Kelip túsken ótinishterdi taldaý negizinde áleýetti ónim berýshilerdi anyqtaý maqsatynda naryq qatysýshylarynan jaýap kútemiz. Kelesi, tórtinshi kezeń eń mańyzdy bolyp tabylady. Bul kezeńde memlekettik organdar naryqtyń daıyn bolýyna taldaý jáne (nemese) retteýshilik áserge taldaý júrgizedi. Taldaý nátıjeleri boıynsha Komıssııa (besinshi kezeń) fýnktsııalardy berýge sońǵy usynymdardy qalyptastyrady. Budan ári altynshy kezeńde tıisti zań jobasy ázirlenedi, Fýnktsııalar básekeles ortaǵa berilýi júzege asyrylatyn zań jobasy qabyldanǵan jaǵdaıda ǵana beriledi. Jetinshi kezeńde básekeles ortaǵa berilgen memlekettik organdardyń fýnktsııalaryn júzege asyrýǵa monıtorıng júrgizý tártibi kózdeledi. Monıtorıng nátıjesi qanaǵattanarlyqsyz bolsa, fýnktsııalardy qaıtarý máselesi Komıssııaǵa shyǵarylady jáne qajet bolǵan jaǵdaıda fýnktsııa memlekettik organǵa zańdy túrde qaıtarylýy múmkin», - dedi ol.

Onyń paıymynsha, usynylǵan algorıtm memlekettik organdar fýnktsııalaryn básekeles ortaǵa sapaly berýdi qamtamasyz etýge múmkindik jasaıdy. Osy kezeńderdiń barlyǵy ashyq jáne azamattarǵa qol jetimdi. Bul azamattyq qoǵam men buqaralyq aqparat quraldary ókilderin keń talqylaýǵa tartýǵa múmkindik beredi.