Memlekettik qyzmetke ornalasý úshin qazaq tilin úırendim – Armen Oganesıan

NUR-SULTAN. QazAqparat – Men memlekettik qyzmette jumysqa kiremin dep sheshtim. Al memlekettik qyzmetkerge memlekettik tildi bilmegen uıat ekenin jaqsy túsinetinmin. Sol sebepti oqýymdy qazaq tilinde jalǵastyrdym. Bul týraly «Uly dalanyń ultaralyq tili» respýblıkalyq forýmynda Nur-Sultan qalasy, Mamandandyrylǵan kúzet qyzmeti Basqarmasynyń polıtseıi Armen Oganesıan aıtty, dep habarlaıdy QazAqparat tilshisi.

«Men 1993 jyly 6 shilde Ózbekstan Respýblıkasy Jızaq oblysynda dúnıege keldim. Ultym – armıan. Ózbek dostarymmen aralasyp, ózbek tilin tolyq meńgerdim. Óz ana tilimde de jaqsy sóıleımin. 14 jasqa tolǵanda, ıaǵnı 2007 jyly otbasymyzben Qyzylorda qalasyna kóship keldik. Orys mektebine qabyldandym. Synyptastarymnyń barlyǵy túrli ult ókilderi bolǵanmen, barlyǵy qazaqsha sóıleıtin. Solarǵa qarap qatty qyzyǵatynmyn. Qazaqstanda óspegendikten, memlekettik tilde men ǵana sóılemeıtin edim. Sodan qatty namystanyp, qaıtsem de qazaq tilin úırenemin dep sheshtim», - deıdi Armen Oganesıan.

Ol dostary men kórshileriniń arqasynda qazaq tilin jetik meńgergen. Mektep bitirgennen keıin Qyzylorda qalasyndaǵy zań kolledjine oqýǵa túsip, oqýyn qazaq tilinde jalǵastyrǵan.

«Men memlekettik qyzmette jumysqa kiremin dep sheshtim. Al memlekettik qyzmetkerge memlekettik tildi bilmegen uıat ekenin jaqsy túsinetinmin. Sol sebepti oqýymdy qazaq tilinde jalǵastyrdym. 2014 jyly Іshki ister organdaryna jumysqa ornalasý úshin Nur-Sultan qalasyna keldim. 2015 jyldan mamandandyrylǵan kúzet qyzmeti basqarmasynda jumys atqaryp kelemin. 2016 jyly jubaıym Dıanamen tanystym, ekeýmiz bir salada qyzmet atqaramyz. 2018 jyly ekeýmiz otbasyn qurdyq. Men de qalyń qazaqtyń kúıeý balasymyn. Medına esimdi qyzymyz bar. Áke-sheshemmen birge turamyz, ekeýi de zeınetker. Rýslan, Artýr esimdi eki aǵam bar. Ekeýide qazaq qyzdaryna úılengen. Qazaqstanǵa kóship kelgenimizge esh ókinbeımin. Qazaq halqyna bizdi qushaq jaıyp qarsy alǵany úshin alǵysym sheksiz», - deıdi ol.

Ol Memleket basshysynyń qazaq tilin jaqsy biletin ózge ult ókilderin qoldaý týraly tapsyrmasy jaqsy júzege asyp jatqanyn aıtty.

«Qazaqstan Prezıdentiniń «Biz qazaq tilin jaqsy biletin ózge ult ókilderin qoldaýymyz kerek. Mundaı azamattar qazaq tiliniń deńgeıin ultaralyq qatynas dárejesine kóterýge kómektesedi» degen tapsyrmasy óz dárejesinde oryndalyp jatqanyn jetkizgim keledi. Memlekettik tildi bilýdiń arqasynda jumysta jaqsy jetistikterge qol jetkizip kelemin. Sondaı-aq qazaq tilin erkin meńgergen jastardyń tizimin jasap, olardy memlekettik qyzmettiń kadr rezervine alý qajet dep oılaımyn. Óıtkeni tildi qurmetteý – sol eldi qurmetteý, memleketti qurmetteý», - deıdi Armen Oganesıan.