Memlekettik qyzmet isteri agenttiginde úzdik qyzmetshiler marapattaldy
Agenttiktiń baspasóz qyzmetiniń habarlaýynsha, memlekettik qyzmettiń bedelin nyǵaıtyp, memlekettik qyzmetshilerdiń bolmysyn nasıhattaýǵa ári olardy yntalandyrýǵa baǵyttalǵan sharaǵa memlekettik qyzmet ardagerleri, Nur-Sultan qalasynyń ákimi, mınıstrlikter men jergilikti atqarýshy organdardyń memlekettik qyzmetshileri, Májilis jáne Senat depýtattary, qoǵam jáne saıası qaıratkerler, sondaı-aq Prezıdent janyndaǵy Memlekettik basqarý akademııasynyń doktoranttary men magıstranttary, Prezıdenttik jastar kadr rezerviniń ókilderi qatysty.
«Jyldyń úzdik memlekettik qyzmetshisi» jáne «Jyldyń úzdik sapaly qyzmet kórsetýshisi» baıqaýynyń jeńimpazdaryn Ardagerler uıymynyń tóraǵasy – Baqtyqoja Іzmuhambetov, Senat depýtaty – Nurtóre Júsip, Memlekettik qyzmet salasyndaǵy qoǵamdyq keńestiń músheleri – Mırbolat Jaqypov pen Anas Baqqojaev marapattady.
Memlekettik qyzmet ardageri Ersultan Bekturǵanov jáne Agenttiktiń memlekettik qyzmet salasyndaǵy baqylaý departamentiniń dırektory Erlan Saparov «Úzdik memlekettik qyzmetshi» tósbelgisine laıyqty dep tanyldy.
Respýblıkalyq baıqaýǵa belsendi qatysqan jáne memlekettik qyzmettiń oń ımıdjin qalyptastyrýǵa úles qosqan memlekettik qyzmetshilerge Agenttik tóraǵasynyń alǵys haty men gramotasy tabystaldy.
Ortalyq jáne jergilikti organdar arasyndaǵy yqpaldastyqtyń nyǵaıýyna qosqan úlesi úshin Memlekettik qyzmet isteri agenttiginiń birqatar qyzmetshisi Nur-Sultan qalasy ákiminiń alǵys hatymen marapattaldy.
Saltanatty sharada MQІA tóraǵasy Darhan Jazyqbaev konkýrs jeńimpazdaryn quttyqtap, Memleket basshysynyń «Memlekettik qyzmette adal ári bilikti kadrlar óte kóp. Olar Otanymyzdyń ıgiligi jolynda tynbaı eńbek etip júr» degen sózine erekshe toqtalyp, memlekettik qyzmet salasyndaǵy jańa syn-tegeýrinderdi sheshýde memlekettik qyzmetshiniń mıssııasy asa zor ekenin atap ótti.
«Basty ustanym – adal nıetpen elge qyzmet etý bolýy kerek. Osy baǵytta sanaly túrde jańǵyrý qajet. Memlekettik qyzmetshige azamattyq sana, eldik sana, memleketshildik sana basty qundylyq bolýy tıis», – dedi D. Jazyqbaev.
Óz sózinde Agenttik tóraǵasy memlekettik qyzmetke kirgende qabyldanatyn anttyń mańyzdylyǵyna erekshe toqtaldy: «Memlekettik qyzmetke kirgende ant berýdiń maǵynasy óte zor. Bul ádettegi formaldi túrde oryndalatyn shara bolyp qalmaýy kerek. Ol úlken jaýapkershilikti ózińniń ar-ojdanyńmen jarııa túrde qabyl alýdy bildiredi. Onyń suraýy da úlken. Árbir memlekettik qyzmetshi osyny erekshe eskerýi kerek. Antqa berik bolý – adam boıyndaǵy qasıetterdiń úlken kórinisi. Antty buzbaý, antty attamaý – bizdiń halyq aldyndaǵy basty paryzymyz».
Shara aıasynda kópshilik aldynda sóıleý, ımıdjmeıkıng, áleýmettik jelilerdi júrgizý boıynsha semınar-trenıngter men joǵary laýazymdy memlekettik qyzmetshilerdiń qalyptasýy týraly áńgime-sessııalar uıymdastyryldy.
Buǵan qosa, memlekettik qyzmetshileriniń ıntellektýaldyq bilimin shyńdaý maqsatynda Memlekettik organdar arasynda alǵash ret «NE? QAIDA? QAShAN?» oıyny ótkizildi.
