Memlekettik hatshy jas ǵalymdardyń І Halyqaralyq forýmyna qatysty
Qyrymbek Kósherbaev forýmnyń «Memleket, ǵylym men bıznestiń ózara áreketi – eldiń ınnovatsııalyq damýynyń negizgi faktory» atty plenarlyq sessııasynda sóz sóıledi. Óz sózinde ol Táýelsizdik jyldarynda Qazaqstannyń Tuńǵysh Prezıdenti – Elbasy N.Á.Nazarbaevtyń saıasatynyń arqasynda qazaqstandyq ǵylymnyń turaqty damýyn qamtamasyz etetin, jas ǵalymdardy memlekettik turǵydan qoldaýdyń tetikterin jetildiretin naqty ári mańyzdy sheshimder qabyldanǵanyn atap ótti.
Memlekettik hatshy zamanaýı ǵylymdy ilgeriletý, qol jetken jetistikterin el ishinde keńinen nasıhattaý ǵylymı-tehnologııalyq damýdyń basym baǵyttarynyń biri ekenin aıtty. Bul tarapta atqarylatyn jumys az emes. Qyrymbek Kósherbaevtyń aıtýynsha, ǵylymı-tehnologııalyq jáne ınnovatsııalyq baǵyttaǵy jumystarǵa ýaqyt talabyna saı ózgeris qajet. Atap aıtqanda, ulttyq ınnovatsııalyq júıe qurý jáne basqarý isine jańa mehanızm engizilýi kerek.
Qyrymbek Kósherbaev Memleket basshysynyń tapsyrmasy boıynsha ǵalymdardyń ǵylymı áleýetin kóterý maqsatynda álemniń irgeli ǵylymı ortalyqtarynda taǵylymdamadan ótýge 500 grant jáne «Jas ǵalym» jobasy boıynsha doktorantýrany aıaqtaǵan azamattarǵa 1000 grant bólýge qatysty jumystar júrip jatqanyn mysal retinde atap ótti.
Sóz sońynda Memlekettik hatshy osyndaı halyqaralyq is-shara uıymdastyrǵan Nursultan Nazarbaev qoryna alǵys aıtyp, forým jumysy otandyq ǵylymnyń damýyna septigin tıgizetinine senim bildirdi.
