Memlekettik bıýdjetke 5,8 trln somasynda kiris tústi
«Memlekettik bıýdjetke 5 trln 832 mlrd teńge somasynda kiris tústi nemese jospar 105,8 paıyzǵa atqaryldy. Respýblıkalyq bıýdjetke 3,6 trln teńge tústi nemese jospar 100,1 paıyzǵa oryndaldy. Jalpy, kirister boıynsha jospar 4 mlrd teńgege asyra oryndaldy, onyń ishinde salyqtar boıynsha 3 mlrd teńgege atqarylmady. Salyqtar boıynsha atqarylmaýdyń negizgi somalary ımportqa qosylǵan qun salyǵyna, korporatıvtik tabys salyǵyna, munaıǵa eksporttyq keden bajyna jáne paıdaly qazbalardy óndirýge salynatyn salyqqa tıesili boldy», - dedi E. Jamaýbaev.
Onyń aıtýynsha, ımportqa qosylǵan qun salyǵy boıynsha jospardyń oryndalmaýy Qazaqstan Respýblıkasynyń úshinshi eldermen taýar aınalymynyń 2020 jyldyń 1-jartyjyldyǵymen salystyrǵanda 1,7%-ke nemese 593 mln dollarǵa tómendeýine baılanysty boldy.
Korporatıvtik tabys salyǵy boıynsha jospardyń oryndalmaýy 2021 jylǵy qańtar-shildede 744 iri salyq tóleýshi boıynsha málimdelgen avanstyq tólemder somasynyń ótken jyldyń sáıkes kezeńimen salystyrǵanda 28%-ǵa azaıýyna baılanysty.
«Shıki munaıǵa eksporttyq keden bajy boıynsha jospardyń oryndalmaýynyń negizgi sebebi Teńiz ken ornynda shıki munaı óndirý kóleminiń tómendeýi boldy. Paıdaly qazbalar óndirýge salynatyn salyq boıynsha jospardyń oryndalmaýy jerasty sýlaryna mólsherlemeniń tómendeýine jáne paıdaly qazbalardy óndirý kóleminiń azaıýyna baılanysty boldy. Degenmen, taýarlardy ótkizý boıynsha aınalymdardyń 1,6 ese ulǵaıýyna baılanysty ishki óndiris taýarlaryna salynatyn qosylǵan qun salyǵy boıynsha jospar asyra oryndaldy. Bul rette, qaıtarý somasy 8,3%-ǵa óskenine qaramastan, qosylǵan qun salyǵyn qaıtarý boıynsha bıznes aldyndaǵy mindettemeler ýaqtyly oryndalýda», - dedi mınıstr.
