Memleket jumysqa turǵany úshin aqsha tóleıdi - vıtse-mınıstr Jaqypova
Al kelesi jyldan bastap ataýly áleýmettik kómektiń jańa júıesi engiziledi. Onyń arqasynda mınıstrlik úıdegi adamdardyń járdemaqysyna qarap otyrǵan azamattardy jumysqa shyǵarýdy josparlap otyr, dep habarlaıdy QazAqparat tilshisi.
«Qazirgi kezde kópbalaly otbasylarǵa arnalǵan memlekettik járdemaqy, turmysy tómen otbasylar úshin 18 jasqa deıingi memlekettik balalar járdemaqysy jáne az qamtylǵan úı sharýashylyǵyna beriletin ataýly áleýmettik kómek bar. Al kelesi jyldan bastap ataýly áleýmettik kómektiń tek eki túri ǵana bolady. Olar - shartty jáne shartsyz aqshalaı kómek», - dedi Jaqypova búgin Astanada ótken baspasóz máslıhatynda. Shartsyz áleýmettik kómek múgedekter, zeınetkerler, mektep jasyndaǵy balalary bar jalǵyzbasty analarǵa kórsetiledi. Osy sanattaǵy azamattarǵa memleketten járdemaqy alǵany úshin jumysqa turý mindeti qoıylmaıdy. Al shartty áleýmettik kómekti alatyndar mindetti túrde jumysqa turýy tıis. Bir otbasyda, kem degende, bir adam eńbekke jaramdy bolsa, shartty aqshalaı kómek ala alady. Ol úshin arnaıy áleýmettik kelisimshartqa qol qoıý qajet. Memleket óz tarapynan tıisti járdemaqy tólep, shartty kómek alyp otyrǵan adamdy oqytyp, jumysqa turǵyzady. Óz kezeginde aqshalaı kómekke júgingen adam jumysqa turý mindetin moınyna alady.
«Máselen, bir otbasyda bes adam bar deıik. Úsh adam eńbekke jaramdy, qalǵan ekeýi mektep jasyndaǵy balalar bolsyn. Jańaǵy úsh adammen áleýmettik kelisimshart jasalady. Sebebi eki bala da mektepke baryp júr. Aldymen ol adamdardyń tabysy esepteledi, mal ustamasa, basqa bir tabys kózderi bolmasa, eń tómengi kúnkóris deńgeıiniń 60 paıyzy, ol 13 myń teńgedeı boldy, sóıtip, bes adamǵa 65 myń teńge beriledi. Eńbekke jaramdy adamnyń bireýi qoldaý sharalarynan, ıaǵnı daıyndyq kýrstaryna qatysýdan, jumysqa turýdan bas tartsa, úsh birdeı adamnyń tólemaqysy 50 paıyzǵa azaıady. Al ekinshi ret bas tartsa, múldem tólenbeıdi. Biraq eki balanyń 26 myń teńgesi qala beredi», - dep atap kórsetti vıtse-mınıstr. Osylaısha, úıdegi bir adam qalǵan eki adamǵa jaýapty bolyp, úsheýi de bir-birin jumysqa ornalasýǵa qamshylap otyrady degen jospar bar.
Vıtse-mınıstrdiń sózine qaraǵanda, osydan úsh jyl buryn atalǵan júıeniń negizinde Aqmola, Shyǵys Qazaqstan men Jambyl oblystarynda «Órleý» atty pılottyq joba atqaryldy. Sóıtip, 2015 jyldyń esebi boıynsha oǵan 20,2 myń adam qatysty. Kelesi jylda shartty kómekke júgingenderdiń sany 38,8 myńǵa jetti. Sonyń arqasynda eńbekke jaramdy azamattardyń 90,5 paıyzy jumysqa tartyldy. Al áleýmettik kómekke qarap otyrǵandardyń sany 24,7 paıyzǵa azaıdy. «Aǵymdaǵy jyly «Órleý» jobasy barlyq aýdandar men qalalarda jalǵasady. Oǵan el bıýdjetinde 7,1 mlrd. teńge qarastyrylǵan. Bıyl atalǵan jobaǵa 150 myń adam tartylady degen jospar bar», - deıdi Svetlana Qabykenqyzy.
Onyń aıtýynsha, shartty aqshalaı kómek alǵan adamǵa jumys tabylmaı qalsa, nátıjeli jumyspen qamtý jáne jappaı kásipkerlikti damytý baǵdarlamasy aıasynda jeke kásibin ashýǵa múmkindik beriledi.
