Memleket uıaly baılanys tarıfin retteı ala ma

ASTANA. KAZINFORM – Jyl basynan beri uıaly baılanys baǵasy ósip keledi. Árbir operator ózindik qun qosyp, tarıf aqysyn kóterýge kóshken. Qoǵamda atalǵan ózgeriske narazy top memleketten máseleni retteýdi talap etýde. Osyǵan oraı quzyrly organ resmı pozıtsııasyn bildirdi.

Redaktsııa tarapynan QR Tsıfrlyq damý, ınnovatsııalar jáne aeroǵarysh ónerkásibi mınıstrligine resmı saýal joldaǵan bolatynbyz. «Uıaly baılanys tarıfterine baılanysty baǵa saıasatyn retteý boıynsha qandaı bastama qolǵa alyndy?» degen suraqqa mınıstrliktiń Telekommýnıkatsııalar komıteti naqty jaýap berdi. Aıtýlarynsha, qoldanystaǵy zańnamaǵa sáıkes memlekettiń uıaly baılanys operatorlaryndaǵy baǵa saıasatyna aralasýǵa quqy joq.

«QR Kásipkerlik kodeksi aıasynda, básekelestikti damytý maqsatynda 2017 jyldyń 1 qańtarynan bastap memleket baılanys qyzmetteri tarıfterin rettemeıdi. Kásipkerlik kodekisiniń 116-baby 1-tarmaǵyna sáıkes kásipkerlik sýbektileri taýarlarǵa tarıf jáne baǵa, jumystar, qyzmetterdi derbes aıqyndaıdy. «Baılanys týraly» Qazaqstan Respýblıkasy Zańynyń 20-babyna sáıkes, eger QR zańdarynda ózgeshe kózdelmese, baılanys operatorlary baılanys qyzmetterine arnalǵan tarıfterdi negizdelgen shyǵyndardy negizge ala otyryp derbes belgileıdi. Komıtettiń ortalyq memlekettik organ retinde sýbektilerdiń ishki isterine aralasýǵa quqyǵy joq ekenin atap ótemiz», – delingen resmı hatta.

Buǵan deıin Uly baılanys tarıfteri nege qymbat degen taqyrypta taldaý materıalyn jarııalaǵan bolatynbyz.