Memleket basshysynyń Jarlyǵymen jańadan 5 mınıstrlik quryldy

ASTANA. QazAqparat - Memleket basshysynyń «Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly» Jarlyǵymen, jańadan 5 mınıstrlik quryldy, dep habarlaıdy QazAqparat Aqordaǵa silteme jasap.

Olar:

- Sý resýrstary jáne ırrıgatsııa mınıstrligi;

- Kólik mınıstrligi;

- Týrızm jáne sport mınıstrligi;

- Mádenıet jáne aqparat mınıstrligi;

- Ónerkásip jáne qurylys mınıstrligi quryldy.

***

Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly

2023 jylǵy 01 qyrkúıek

Qazaqstan Respýblıkasy Konstıtýtsııasynyń 44-babynyń 3) tarmaqshasyna sáıkes memlekettik basqarý júıesin jańǵyrtý jáne onyń tıimdiligin arttyrý maqsatynda QAÝLY ETEMІN:

1. Mynalar:

1) Qazaqstan Respýblıkasynyń Ekologııa jáne tabıǵı resýrstar mınıstrligi odan Qazaqstan Respýblıkasynyń Sý resýrstary jáne ırrıgatsııa mınıstrligin bólip shyǵarý, oǵan sý qoryn paıdalaný jáne qorǵaý, sýmen jabdyqtaý, sý burý salasyndaǵy fýnktsııalar men ókilettikterdi berý jolymen;

2) Qazaqstan Respýblıkasynyń Indýstrııa jáne ınfraqurylymdyq damý mınıstrligi ony:

temirjol, avtomobıl, ishki sý kóligi; saýda maqsatynda teńizde júzý salalaryndaǵy; Qazaqstan Respýblıkasynyń áýe keńistigin paıdalaný men azamattyq jáne eksperımenttik avıatsııa qyzmeti; aeronavıgatsııa men áýejaılardyń kórsetiletin qyzmetteri salasyndaǵy tabıǵı monopolııalar; áýejaılardyń kórsetiletin qyzmetteri salasyndaǵy qoǵamdyq mańyzy bar naryqtar; avtomobıl joldary salasyndaǵy fýnktsııalar men ókilettikter berile otyryp, Qazaqstan Respýblıkasynyń Kólik mınıstrligine;

ındýstrııa jáne ındýstrııalyq damý; ónerkásip; taý-ken metallýrgııa kesheni; elishilik qundylyqty damytý; mashına jasaý; kómir, hımııa, jeńil (aýyl sharýashylyǵy janýarlarynyń terisi men júnin qaıta óńdeýden basqa), aǵash óńdeý jáne jıhaz ónerkásibi; qurylys ındýstrııasy jáne qurylys materıaldaryn óndirý; mashınalar men jabdyqtardyń qaýipsizdigi; salalyq baǵytqa sáıkes hımııalyq ónimniń qaýipsizdigi; ózindik ereksheligi bar taýarlardy baqylaý; energııa únemdeý jáne energııa tıimdiligin arttyrý; baǵaly metaldar óndirisin jáne baǵaly metaldar men asyl tastardyń aınalymyn retteý; quramynda baǵaly metaldar bar shıkizat taýarlary; zergerlik jáne basqa da buıymdar; arnaıy ekonomıkalyq aımaqtardy qurý, olardyń jumys isteýi jáne taratylýy; ýran óndirýdi qospaǵanda, paıdaly qatty qazbalar bóliginde jer qoınaýyn paıdalanýdy memlekettik basqarý; jer qoınaýyn memlekettik geologııalyq zertteý, mıneraldyq-shıkizat bazasyn molaıtý salalaryndaǵy; sáýlet, qala qurylysy jáne qurylys qyzmeti; turǵyn úı qatynastary; kommýnaldyq sharýashylyq; eldi mekender sheginde sýmen jabdyqtaý jáne sý burý, jylýmen jabdyqtaý (ortalyqtandyrylǵan jylýmen jabdyqtaý aımaǵynda jylý energııasyn óndirýdi júzege asyratyn jylý elektr ortalyqtary men qazandyqtardan basqa) salasyndaǵy memlekettik retteý; turǵyn úı qurylysyna úlestik qatysý; qorǵanys ónerkásibi; biryńǵaı áskerı-tehnıkalyq saıasatty júrgizýge qatysý; áskerı-tehnıkalyq yntymaqtastyqty júzege asyrý; memlekettik qorǵanystyq tapsyrysty qalyptastyrý, ornalastyrý jáne oryndaý salasyndaǵy fýnktsııalar men ókilettikter berile otyryp, Qazaqstan Respýblıkasynyń Ónerkásip jáne qurylys mınıstrligine bólý jolymen;

3) Qazaqstan Respýblıkasynyń Aqparat jáne qoǵamdyq damý mınıstrligi oǵan Qazaqstan Respýblıkasynyń Mádenıet jáne sport mınıstrliginen mádenıet; tarıhı-mádenı mura obektilerin qorǵaý jáne paıdalaný; kınematografııa; memlekettik rámizder; arhıv isi jáne basqarýdy qujattamalyq qamtamasyz etý; elektrondyq qujat aınalymy jáne elektrondyq arhıvter salalaryndaǵy; onomastıka; kreatıvti ındýstrııalar jáne shyǵarmashylyq qyzmet nátıjelerin kommertsııalandyrý salasyndaǵy fýnktsııalar men ókilettikterdi bere otyryp, ony Qazaqstan Respýblıkasynyń Mádenıet jáne aqparat mınıstrligi etip qaıta qurý jolymen;

4) Qazaqstan Respýblıkasynyń Mádenıet jáne sport mınıstrligi ony Qazaqstan Respýblıkasynyń Týrızm jáne sport mınıstrligi etip qaıta qurý jolymen qaıta uıymdastyrylsyn.

2. Qaıta uıymdastyrylǵan memlekettik organdar beriletin fýnktsııalar ókilettikterge sáıkes qaıta uıymdastyrylatyn memlekettik organdardyń quqyqtary men mindettemeleriniń quqyq mırasqorlary bolyp aıqyndalsyn.

3. Qazaqstan Respýblıkasynyń Úkimeti:

1) Qazaqstan Respýblıkasy Prezıdentiniń Ákimshiligimen kelisý boıynsha qaıta uıymdastyrylatyn memlekettik organdar men olarǵa vedomstvolyq baǵynysty uıymdardyń shtat sanyn qaıta bólýdi;

2) osy Jarlyqty iske asyrý boıynsha ózge de sharalardy qabyldaýdy qamtamasyz etsin.

4. «Qazaqstan Respýblıkasy Úkimetiniń qurylymy týraly» Qazaqstan Respýblıkasy Prezıdentiniń 1999 jylǵy 22 qańtardaǵy №6 Jarlyǵyna mynadaı ózgerister men tolyqtyrýlar engizilsin:

1-tarmaqta:

myna:

«Qazaqstan Respýblıkasynyń Mádenıet jáne sport mınıstrligi;» degen jol mynadaı redaktsııada jazylsyn:

«Qazaqstan Respýblıkasynyń Týrızm jáne sport mınıstrligi;»;

myna:

«Qazaqstan Respýblıkasynyń Indýstrııa jáne ınfraqurylymdyq damý mınıstrligi;» degen jol alyp tastalsyn;

myna:

«Qazaqstan Respýblıkasynyń Aqparat jáne qoǵamdyq damý mınıstrligi;» degen jol mynadaı redaktsııada jazylsyn:

«Qazaqstan Respýblıkasynyń Mádenıet jáne aqparat mınıstrligi;»;

mynadaı mazmundaǵy joldarmen tolyqtyrylsyn:

«Qazaqstan Respýblıkasynyń Sý resýrstary jáne ırrıgatsııa mınıstrligi;

Qazaqstan Respýblıkasynyń Kólik mınıstrligi;

Qazaqstan Respýblıkasynyń Ónerkásip jáne qurylys mınıstrligi.».

5. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

6. Osy Jarlyq qol qoıylǵan kúninen bastap qoldanysqa engiziledi.

Qazaqstan Respýblıkasynyń Prezıdenti Q. Toqaev