Memleket basshysynyń alysty boljaı biletin kemel kóregendigi
Dana qazaq: «Yrys, qaıda barasyń? Yntymaqqa baramyn» dep qadap aıtýy beker emes. Al, ult ustazy, hakim Abaıdyń: «Adamzattyń bárin súı baýyrym dep» degen naqyl sózi keleshekke qaldyrǵan amanaty ispettes. Qazaqstan Respýblıkasynyń Prezıdenti Nursultan Nazarbaev burynǵy ótken danalardyń sózine egemendik jyldar belesinde árdaıym júginip kele jatqanyna kýá bolyp otyrmyz. Sonyń taǵy bir naqty aıǵaǵy retinde Elbasynyń «Nur Otan» partııasy saıası keńesiniń otyrysynda «Nurly jol - bolashaqqa bastar jol» atty halyqqa arnaǵan jańa Joldaýyn erekshe atap ótýge bolady. Elimiz úshin mańyzdy bolyp tabylatyn jańa ekonomıkalyq saıasatta kemel keleshegimizdi aıqyndaıtyn basym baǵyttarmen birge, turaqtylyqtyń negizi - elimizdiń áleýmettik, rýhanı-mádenı máselelerin de atap aıtyp, «Máńgilik El» ıdeıasynyń qazaqstandyqtar úshin mańyzyn tolyǵymen túsindirip ótti. Sonymen qatar, bıylǵy jyly Qazaq handyǵynyń 550 jyldyǵy, Qazaqstan halqy Assambleıasynyń 20 jyldyǵy, Jeńistiń 70 jyldyǵy atap ótiletin bolady.
Bul sheshimder Memleket basshysynyń alysty boljaı biletin kemel kóregendigin taǵy bir aıqyn tanytqan eleýli qadamy bolǵanyn aıtqan lázim. Kúlli álemdegi kez kelgen egemen memlekettiń san ǵasyrlar belesinde óz mańyzy men qunyn joǵaltpaı, babadan balaǵa asyl mura bolyp kele jatqan zańdar jınaǵy bolady. Osyndaı Ata Zań ıakı elimizdiń álemdik órkenıetke qaraı qaryshty qadam basýynyń alǵysharttaryn jasap bergen jasampaz qujat egemendiktiń eleń-alań shaǵynda qabyldanǵan bolatyn. Bul qazaq jerin mekendegen baıyrǵy jurttyń san ǵasyrlyq armany bolsa, demokratııalyq damý jolyn tańdaǵan jas respýblıkanyń basqa eldermen terezesi teń bolyp, qanatyn keńinen jaıýyna múmkindik beredi. Álemdik daǵdarys synaqtary kezeńinde el ekonomıkasyn turaqtandyryp, aldyn alýdyń barlyq sharalaryn qabyldaý qajettiligi týyndady. Iá, memleketimizdiń qysqa ýaqyt aralyǵynda óz Konstıtýtsııasyn jasap, qabyldaǵany talaılardy tańqaldyrǵany ras. Dese de biz quptaı qaraǵandarǵa da, synaı úńilgenderge de mán bermesten ólsheýli ýaqyt, tabandy talap, shyǵarmashylyq is-árekettiń arqasynda alǵa qoıǵan maqsatymyzǵa jettik.
Ata Zań - ata-babalar armandaǵan azattyǵyńdy aıqyndaıtyn, egemendigińdi pash etetin, Táýelsiz el ekendigińdi tanytatyn, derbes memlekettigińdi kórsetetin qasterli qujat. Ata Zań - eldigimizdiń tiregi, azamattyń arqa súıer altyn arqaýy. Bizdiń kúlli tynys-tirshiligimizdi, ómir saltymyz, qoǵamnyń tamyr búlkili - barlyǵy sol Zańnan bastaý alatyndyǵy ras. Ata Zań - tal besikten, jer besikke deıingi ýaqyt aralyǵynda sizdiń quqyǵyńyzdy saqtaıtyn, sórede qaraýsyz jatpaıtyn altyn zań. Ata Zań - el azamatynyń konstıtýtsııalyq quqyn tanytatyn, ár otandasymyz buljytpaı oryndaıtyn zańdardyń altyn arqaýy, temirqazyǵy. Ata Zań - babalar amanaty. Keshegi Qasymnyń «qasqa joly», Esimniń «eski joly», áz Táýkeniń «Jeti jarǵysynyń» jalǵasy, zańdy murageri - Qazaq eliniń búgingi Konstıtýtsııasy. Tarıhtyń tereń qoınaýyna úńiler bolsaq, alǵashqy qazaq handyǵy qurylǵanda ata-babalar dástúrimen qatar, 1511 jyly 19-baptan turatyn Negizgi zań qabyldanǵan. Oǵan qazaq «Qasym hannyń qasqa joly» dep at qoıyp, aıdar taqqan bolatyn. Áli de solaı atalady. 1690 jyly Táýke han «Jeti jarǵyny» qabyldady. Bul Zań - jeti ádettik quqyqtyq júıeden turatyn qoǵamdyq qatynastardy retteıtin salalardyń jıyntyǵy. «Jeti jarǵyny» jasaýǵa danagóı bıler belsene atsalysypty. Aty ańyzǵa aınalǵan ataqty Tóle bı qaıtys bolar aldynda úsh júzdiń ıgi jaqsylaryn jınap alyp: «Attyń qunyn, erdiń qunyn, áıeldiń qunyn óz aqylymyzsha sheshken jón» dep keńes bergen eken. «Malǵa salsań baspaıtyn, ursań shappaıtyn jaby bar da, qýsań jetetin, qashsań qutqaratyn jelden júırik tulpar bar, eki adamnyń basy qosylsa ósek aıtatyn áıel bar da, bir elge ana, pana bolatyn áıel bar. Sheshim aıtqanda osylardyń ara-jigin ashyp, ekshep baryp, qun kesýlerińdi ótinem», - dep amanattapty artta qalyp bara jatqan el aǵalaryna.