Memleket basshysy: Qazaqstannyń halyqaralyq bedelin saqtap, álemdik arenadaǵy rólin kúsheıtýge tıispiz

NUR-SULTAN. QazAqparat – Koronavırýs indeti álemdik saıasat pen ekonomıkany túbegeıli ózgeriske ushyratty. Bul týraly QR Syrtqy ister mınıstrliginiń keńeıtilgen alqa májilisinde QR Prezıdenti Qasym-Jomart Toqaev málim etti, dep habarlaıdy QazAqparat tilshisi.

«Іndet bastalǵannan beri álemdik saıasat pen ekonomıka túbegeıli ózgeriske ushyraýda. Jahandyq shıelenister órship kele jatyr. Bul – elimiz úshin betburysty kezeń. Aldymyzda uzaq merzimdi mindetter tur. Biz Qazaqstannyń halyqaralyq bedelin saqtap, álemdik arenadaǵy rólin kúsheıtýge tıispiz. Osyǵan oraı syrtqy saıası jumys tásilderin qaıta saralap, júıeli sharalar ázirleýimiz kerek. Bul mindetti tabysty oryndasaq, ulttyq dıplomatııa ýaqyt talabyna jáne azamattarymyzdyń suranysyna saı bolady. Eń aldymen, memleketimizdiń múddesin laıyqty qorǵaı alamyz», - dedi Memleket basshysy.

Prezıdent Syrtqy ister mınıstrliginiń osyndaı aýqymdy basqosýy sońǵy alty jylda alǵash ret ótkizilip jatqanyn atap ótti.

«Sondyqtan, biz qordalanǵan túıtkildiń bárin muqııat taldap, aqyldasýymyz kerek», - dedi Qasym-Jomart Toqaev.

Budan buryn habarlanǵandaı, Memleket basshysy Qazaqstannyń Eýrazııanyń geosaıası jáne geoekonomıkalyq júıesindegi joǵary mártebesin nyǵaıta túsý kerek ekenin aıtty.