Memleket basshysy UQK tóraǵasy Ermek Saǵymbaevty qabyldady
ASTANA. KAZINFORM –Prezıdentke vedomstvonyń jyl basynan beri atqarǵan jumysynyń negizgi nátıjeleri men aldaǵy kezeńge arnalǵan mindetteri jóninde esep berildi, dep habarlaıdy Aqordanyń baspasóz qyzmeti.
Ermek Saǵymbaevtyń aıtýynsha, ulttyq qaýipsizdik organdary ekstremızm men terrorızmge qatysy bar 67 adamdy ustaǵan. Radıkaldyq aǵymnyń jetegine ergen 83 adam sottaldy.
Іshki ister mınıstrligimen birlese qabyldanǵan sharalar nátıjesinde 17 qylmystyq top quryqtalyp, olardyń 244 múshesi ustaldy. 96 adam qamaýǵa alyndy.
Zańsyz aınalymnan 453 qarý, 64 granata, 6 myńǵa jýyq oq-dári tárkilendi. 16 esirtki zerthanasy, 25 halyqaralyq jáne 19 óńirlik esirtki tasymaldaý arnasy joıyldy. 20 tonnaǵa jýyq esirtki zattary, sonyń ishinde 13 tonna kolýmbııalyq kokaın men 10 tonna prekýrsor aınalymnan alyndy.
Ekonomıkalyq qaýipsizdikti qamtamasyz etý jáne jemqorlyqqa qarsy kúres aıasynda memleketke 3,8 trıllıon teńge kóleminde zalal keltirilmedi. Bıýdjetke 255 mıllıard teńge óteldi. Korrýptsııa faktisi boıynsha 91 qylmystyq is qozǵaldy.
Kezdesý sońynda Prezıdent ulttyq qaýipsizdik organdarynyń qyzmetine qatysty birqatar tapsyrma berdi.
Aıta keteıik, osyǵan deıin Prezıdent Memlekettik tý kóterý rásimine qatysty.