Memleket basshysy UEFA prezıdenti Aleksander Cheferındi qabyldady
ASTANA. KAZINFORM – Qasym-Jomart Toqaev mártebeli meımanǵa iltıpat bildirip, Eýropalyq fýtbol qaýymdastyqtary odaǵynyń elimizge kórsetip otyrǵan qoldaýyna joǵary baǵa berdi, dep habarlaıdy Aqordanyń baspasóz qyzmeti.
Prezıdent búginde 1 mıllıonnan astam otandasymyz fýtbolmen shuǵyldanatynyn aıtty. Bul – sportpen aınalysatyn azamattarymyzdyń 13 paıyzy. Budan atalǵan sport túriniń buqaralyq sıpat alǵanyn kórýge bolady.
Memleket basshysy otandyq fýtboldyń naryq talaptaryna saı ornyqty bıznes modelin qalyptastyryp, klýb menedjmentin damytý mańyzdy ekenine nazar aýdardy. Osy rette Qasym-Jomart Toqaev Uıymmen bilim berý jáne tájirıbe almasý baǵdarlamasyn júzege asyrý baǵytyndaǵy yqpaldastyqqa qoldaý bildirdi. Bul mamandar men jas oıynshylardyń kásibı deńgeıin arttyrýdy kózdeıdi.
Aleksander Cheferın kezdesýge múmkindik jasaǵany úshin Prezıdentke alǵys aıtyp, Qazaqstanmen aradaǵy seriktestikti keńeıtýge daıyn ekenin jetkizdi. Sondaı-aq UEFA men Qazaqstan fýtbol federatsııasy arasynda berik baılanys ornaǵanyn atap ótti.
Kezdesý sońynda Qasym-Jomart Toqaev Qazaqstan sportynyń damýyna qosqan úlesi úshin Aleksander Cheferındi II dárejeli «Dostyq» ordenimen marapattady.
Osyǵan deıin Atom energııasy jónindegi agenttik tóraǵasynyń orynbasarlary taǵaıyndalǵanyn jazdyq.