Memleket basshysy statıstıka qyzmetkerlerin kásibı merekesimen quttyqtady
ASTANA. KAZINFORM – Memleket basshysy Qasym-Jomart Toqaev Qazaqstan memlekettik statıstıkasynyń 105 jyldyǵyna oraı quttyqtaý joldap, bul salanyń el damýy úshin aıryqsha mańyzǵa ıe ekenin atap ótti.
Prezıdent quttyqtaýyn QR Strategııalyq josparlaý jáne reformalar agenttiginiń tóraǵasy Áset Erǵalıev Qazaqstan memlekettik statıstıkasynyń 105 jyldyǵyna arnalǵan «Ulttyq statıstıkalyq júıelerdi tsıfrlyq transformatsııalaý» halyqaralyq forýmynda oqyp berdi.
– Qurmetti Memlekettik statıstıka qyzmetkerleri men ardagerleri! Sizderdi Qazaqstannyń statıstıka organdarynyń qurylǵanyna 105 jyl tolýymen quttyqtaımyn! Ulttyq statıstıka qyzmeti osy ýaqyt ishinde zaman talabyna saı jańaryp, damýdyń sara jolynan ótti. Qazir bul sala memlekettik basqarý, ekonomıka men qoǵamdy órkendetý isinde aıryqsha ról atqarady. Statıstıka málimetteri arqyly ekonomıkalyq jáne qoǵamdyq úrdister týraly shynaıy kózqaras qalyptasady. Sonymen qatar, uzaq merzimge arnalǵan boljamdar jasalyp, naqty sheshimder qabyldanady. Qazirgideı qubylmaly zamanda aqparattyń ashyq ári senimdi bolýy óte mańyzdy. Málimetterdiń túrli derekkózderin keńinen paıdalanyp, bir-birimen salystyryp, tyń tásilder men quraldardy qoldanyp, saraptamalyq qyzmetti kúsheıtý qajet. Ozyq tehnologııalar dáýirinde jasandy ıntellektini jappaı engizý – mańyzdy mindet. Memlekettik statıstıka qyzmeti Qazaqstannyń tsıfrlyq el retinde damýyna belsene atsalysýǵa tıis. Osy saladaǵy barlyq jetistik – statıstıka mamandarynyń qajyrly eńbegi men kásibı sheberliginiń nátıjesi. Bul – óz isine adal, jaýapkershiligi zor, joǵary bilikti azamattardyń qolynan keletin is. Sizder aldaǵy ýaqytta da tabandy eńbek etip, Qazaqstannyń turaqty damýyna mol úles qosa beresizder dep senemin. Barshańyzǵa amandyq jáne tabys tileımin! – delingen Prezıdent quttyqtaýynda.
Ulttyq statıstıka bıýrosy málimetinshe, eki kúnge sozylatyn is-sharaǵa halyqaralyq uıymdardyń, ózge elderdiń ulttyq statıstıka qyzmetteriniń, memlekettik organdardyń, ǵylymı jáne saraptamalyq qaýymdastyqtyń 150-den astam ókili qatysyp jatyr.
Aıta keteıik, Qazaqstan statıstıkasynyń resmı tarıhy 1920 jyldyń 8 qarashasynan bastaý alady. Sol kúni memlekettik statıstıka týraly Ereje bekitilip, Qazaq AKSR-niń Statıstıkalyq basqarmasy quryldy. 1998 jyly Prezıdent Jarlyǵymen 8 qarasha – Statıstıka kúni bolyp belgilendi.
Aıta keteıik, Ulttyq statıstıka bıýrosy Qazaqstan halqynyń naqty sanyn atady.