Memleket basshysy Saıasat Nurbekti qabyldady
Memleket basshysy Ǵylym jáne joǵary bilim mınıstri Saıasat Nurbekti qabyldady, dep habarlaıdy Kazinform Aqordaǵa silteme jasap.
Kezdesýde Prezıdent tapsyrmalaryn oryndaý úshin Joǵary bilim men ǵylymdy damytýdyń 2023-2029 jyldarǵa arnalǵan tujyrymdamasy qabyldanǵany týraly baıandaldy. Qujat atalǵan salany órkendetýdiń strategııalyq mindetteri men kórsetkishterin aıqyndaıdy.
Mınıstrdiń aıtýynsha, bıyl qyrkúıek aıynan bastap Qazaqstanda bakalavrıat baǵdarlamasy boıynsha stıpendııa mólsheri 20 paıyzǵa, magıstratýra men doktorantýrada 15 paıyzǵa kóbeıdi.
Joǵary oqý oryndaryndaǵy professor-oqytýshylar quramynyń jalaqysy 160 myń teńgeden 350 myń teńgege deıin, al ulttyq ýnıversıtetterde bul kórsetkish 228 myń teńgeden 400 myń teńgege deıin ósti.
Sonymen qatar stýdentter jataqhanalaryndaǵy oryn tapshylyǵy úsh ese, ıaǵnı 2022 jylǵy 55 050-den 2023 jylǵy qazanda 17 488-ge deıin azaıdy.
Qasym-Jomart Toqaevqa joǵary bilim berý salasyndaǵy ınfraqurylym men tsıfrlyq arhıtektýranyń damýy, sonyń ishinde Ál-Farabı atyndaǵy QazUÝ men L.N.Gýmılev atyndaǵy EUÝ kampýstarynyń qurylysy týraly málimet berildi.
Mınıstrlik tsıfrlyq ýnıversıtet modelin ázirlep jatyr. Stýdentter Coursera jahandyq onlaın bilim berý platformasynda oqý múmkindigine ıe boldy. Qazirdiń ózinde 40 myńy sertıfıkat aldy. Platformadaǵy 100 negizgi kýrsty qazaq tilinde oqýǵa bolady.
Memleket basshysyna Qazaqstannyń álemdik bilim berý keńistiginde belsendi ilgerilep kele jatqany týraly baıandaldy. QS reıtıngine 21 joǵary oqý orny, al Times Higher Education reıtıngine 4 ýnıversıtet kiredi.
Jyl sońyna deıin elimizde jumys isteıtin jetekshi sheteldik ýnıversıtetter fılıaldarynyń sany segizge jetedi. Halyqaralyq kompanııalarmen birlesip, jasandy ıntellekt salasynda kadr daıarlaý isi bastaldy.
«Mamandyǵym – bolashaǵym» jobasy aıasynda óńirlerde kadr qajettiligine forsaıt-zertteý júrgizý úshin jobalyq keńseler ashylyp jatyr.
Qasym-Jomart Toqaevqa berilgen málimet boıynsha Ulttyq ǵylym akademııasynyń ınstıtýtsıonaldyq róli kúsheıip keledi. Prezıdent janyndaǵy Ǵylym jáne tehnologııalar jónindegi ulttyq keńes óz jumysyn bastady.
Ǵalymdardyń ortasha jalaqysy 2 ese ósip, 252 myń teńgege jetti. Іrgeli zertteýlermen aınalysatyn ǵylymı-zertteý ınstıtýttary tikeleı qarjylandyrylatyn boldy. Ǵylym salasynyń 2023-2025 jyldarǵa arnalǵan jalpy bıýdjeti 3,3 ese artyp, 643 mıllıard teńgeni qurady.
Q.Sátbaev atyndaǵy Qazaq ulttyq tehnıkalyq zertteý ýnıversıtetiniń ǵalymdary tazalyǵy 99,5 paıyz mólsherinde selen alý tehnologııasyn oılap tapty.
Bul hımııalyq element medıtsınada, elektronıkada jáne shyny óndirisinde keńinen qoldanylady. Osy jańalyqtyń arqasynda Qazaqstan atalǵan sırek metaldy anaǵurlym tıimdi baǵamen eksporttaı alady.
Kezdesý sońynda Memleket basshysy bilim berý deńgeıin arttyrý, ınnovatsııalardy yntalandyrý jáne ǵylymı zertteý jumystarynyń sapasyn jaqsartý, sondaı-aq stýdentter jataqhanalaryndaǵy oryn tapshylyǵyn azaıtý jóninde birqatar tapsyrma berdi.
