Memleket basshysy resýrstardy únemdep paıdalanýǵa shaqyrdy
ASTANA. KAZINFORM — Qasym-Jomart Toqaev Qazaqstannyń energetıkalyq kartasynda atom stantsııasynyń paıda bolýy el ekonomıkasynyń jańa ári sapaly deńgeıge kóshkenin bildiretinin atap ótti.
Memleket basshysy qazir búkil álem túbegeıli betburys kezeńin bastan ótkerip jatqanyn alǵa tartyp, atom stantsııasynyń qurylysyn bastaý týraly strategııalyq sheshimniń mańyzyna nazar aýdardy.
Prezıdenttiń paıymdaýynsha, bul bolashaqta elimizdiń energetıkalyq kelbetin túbegeıli ózgertip, ekonomıkamyzdy qaıta qurýǵa yqpal etedi.
– Balqash atom elektr stantsııasynyń qurylysy, odan keıingi salynatyn ekinshi AES Qazaqstannyń energetıkalyq áleýetin arttyratyny sózsiz. Sondaı-aq ıadrolyq energetıka sııaqty mańyzdy salada jańa baǵyttardyń damýyna septigin tıgizetin bolady. Qazaqstannyń energetıkalyq kartasynda atom stantsııasynyń paıda bolýy el ekonomıkasynyń jańa ári sapaly deńgeıge kóshkenin bildiredi. Jalpy, dúnıe júzinde bolyp jatqan aýqymdy ózgeristerdiń energetıka salasyna yqpal etetini sózsiz. Álemde qýat kózderine qyzý tartys júrip jatyr desek, artyq bolmaıdy. Buǵan saqadaı saı daıyn bolǵanymyz jón. Memleket energetıka mamandarynyń jańa býynyn daıarlap, osy salanyń áleýetin arttyra beredi, – dedi Prezıdent.
Memleket basshysy resýrstardy únemdep paıdalanýǵa shaqyrdy. Prezıdenttiń aıtýynsha, azamattarymyz da bul máselege jaýapkershilikpen qaraýy kerek.
– Elektr qýaty, jylý jáne sý – turmysqa asa qajetti ıgilikter. Sonyń bárin únemdep, aqylmen paıdalanǵan abzal. Jalpy, bul – tutas ekonomıkaǵa ortaq talap. Ysyrapshyldyqqa jol berýge bolmaıdy. Halqymyz «Únemshildik – yrystyń kilti» dep beker aıtpaǵan. Biz osy qasıetti ulttyq daǵdymyz etip, qoǵamda múldem jańa mádenıet qalyptastyrýymyz kerek. Sizderdiń qajyrly qyzmetterińiz – elimizdiń energetıkalyq derbestiginiń myzǵymas kepili. Ádiletti, Taza, Qýatty Qazaqstanda ózderińiz sııaqty eńbek adamdary eń joǵary syı-qurmetke laıyq, – dedi Memleket basshysy.
Aıta keteıik, Ekibastuzdaǵy ekinshi GRES-te jańa energobloktar salynady.