Memleket basshysy: Otandyq ónerkásip úshin maman daıarlaý isi – óte ózekti másele
ASTANA. KAZINFORM – Prezıdent Aqordada ótip jatqan Ǵylym jáne tehnologııalar jónindegi ulttyq keńestiń otyrysynda otandyq ónerkásip úshin bilikti mamandardy daıarlaý máselesin sóz etti.
«Іri óndiristik kompanııalarmen birge «ındýstrıaldy PhD» daıarlaý mehanızmin ázirlep, qoldanysqa engizgen jón. Tájirıbelik-konstrýktorlyq jumystar men ǵylymı zertteýler ózara baılanysa otyryp, óndiriske ınnovatsııalyq sheshimderdi engizýge yqpal etedi. Jalpy, elimizdiń jetekshi joǵary oqý oryndary men sheteldik ýnıversıtetterdiń fılıaldary ekonomıkamyzdyń basym salalary úshin ǵalymdar men bilikti mamandardy jedel daıarlaýǵa tıis. Mysaly «jasyl» energetıka, klımattyń ózgerýi, sý resýrstaryn únemdeý salalaryndaǵy kadrlarǵa suranys aıtarlyqtaı artyp keledi. Otandyq ónerkásip úshin maman daıarlaý isi – óte ózekti másele. Ǵylym jáne joǵary bilim mınıstrligine halyqaralyq standarttar men tájirıbeni eskerip, ınjenerlik-tehnıkalyq kadrlardy daıarlaýdyń ulttyq modelin ázirleýdi tapsyramyn. Buǵan qosa óńirlik joǵary oqý oryndarynyń bazasynda ozyq ınjenerlik mektepter ashý qajet. Bul mektepterdegi bilim berý baǵdarlamalary men tehnologııalyq jobalar ónerkásiptiń basym salalaryndaǵy suranysqa negizdelýi kerek. Bilim salasy men eńbek naryǵyn ushtastyrýǵa yqpal etetin «Meniń mamandyǵym – meniń bolashaǵym» jobasy jaqsy nátıje kórsetip otyr. Joba aıasynda Mamandyqtar atlasy ázirlenip, ekonomıkanyń qurylymy men ár aımaqtyń damý tendentsııasy zerttelýde. Keleshekte ár óńirdiń belgili bir salaǵa mamandanýyn kórsetetin Óńirlik ekonomıka atlasyn daıyndaý máselesin pysyqtaý kerek. Munyń bári bilim berý baǵdarlamalaryn ýaqytyly jańartýǵa múmkindik beredi. Negizgi mindet – óńirlik joǵary oqý oryndaryn kadrlardy aldyn ala daıarlaıtyn jáne qoldanbaly ǵylymı-zertteý jumystaryn júrgizetin ortalyqqa aınaldyrý», - dedi Prezıdent.
Eske sala keteıik, buǵan deıin Memleket basshysy ǵylymmen aınalysyp júrgen jastardyń sany kóbeıip kele jatqanyn aıtqan bolatyn.
