Memleket basshysy «Ortalyq Azııa – AQSh» sammıtine qatysty

ASTANA.KAZINFORM —  Qasym-Jomart Toqaev Aq úıde tarıhı kezdesý uıymdastyrǵany úshin AQSh Prezıdentine alǵys aıtyp, S5+1 formatyndaǵy sammıt shyn máninde Ortalyq Azııa men Qurama Shtattar arasyndaǵy yntymaqtastyqtyń jańa kezeńine jol ashqanyna nazar aýdardy. Bul týraly Aqordanyń baspasóz qyzmeti habarlady.

Memleket basshysy AQSh Prezıdenti Donald Tramptyń halyqaralyq saıasattaǵy róline aıryqsha toqtalyp, ony kórnekti memleket qaıratkeri dep baǵalady.

– Siz júrgizip otyrǵan parasatty jáne batyl saıasatty búkil álem qoldaýǵa laıyq dep sanaımyn. Men de Sizdiń ustanymdaryńyzdy qýattaımyn. Sizdiń jetekshiligińizben Amerıka altyn dáýirge qadam basty. Biz «Amerıkany qaıtadan uly elge aınaldyrý» (Making America Great Again) dep atalatyn kóregen tujyrymdamańyzdy joǵary baǵalaımyz. Bul maqsat «Zań jáne tártip» qaǵıdatyna negizdelgen Ádiletti, Qýatty Qazaqstan qurýdy kózdeıtin aýqymdy strategııamyzben úndesedi. Bitimger Prezıdent retinde segiz aıdyń ishinde segiz soǵystyń toqtaýyna yqpal ettińiz. Osylaısha, Amerıkanyń halyqaralyq turaqtylyqqa tirek bolǵan rólin aıtarlyqtaı kúsheıte tústińiz, – dedi Qasym-Jomart Toqaev.

Prezıdent Qazaqstannyń Qurama Shtattarmen strategııalyq seriktestikti odan ári nyǵaıtýǵa nıetti ekenin rastady.

– Qazaqstan men AQSh arasyndaǵy san qyrly yntymaqtastyqty damytýdy udaıy qoldap kelesiz. Men muny joǵary baǵalaımyn. Aq úıde Prezıdent laýazymyn atqarǵan alǵashqy kezeńde bizdiń qarym-qatynasymyz keńeıtilgen strategııalyq seriktestik deńgeıinde zańnamalyq turǵydan bekidi. AQSh – Qazaqstanǵa 100 mıllıard dollardan asa qarjy salǵan eń iri ınvestorymyz, ekonomıkamyzdyń qozǵaýshy kúshi sanalady. Sońǵy jyldary elderimiz arasyndaǵy taýar aınalymy eki ese ósip, 5 mıllıard dollar mejesine jýyqtady. Amerıkadaǵy ýranǵa suranystyń shamamen 25 paıyzyn qamtamasyz etip otyrmyz. Qazaqstanda 600-den astam amerıkalyq kompanııa bıznes júrgizedi, – dedi Memleket basshysy.

Qasym-Jomart Toqaev sapar aıasynda eki el kompanııalary jalpy somasy 17 mıllıard dollardan asatyn kelisimder jasasqanyn aıtty.

Jalpy, Qazaqstan men AQSh-tyń energetıka, asa mańyzdy mıneraldar, ónerkásip, kólik, qarjy, jasandy ıntellekt, bilim sekildi negizgi salalardy qamtıtyn ekonomıkalyq áleýeti jarty trıllıon dollardan asady.

Prezıdent amerıkalyq kompanııalardy elimizde ınvestorlar úshin jasalǵan ońtaıly jaǵdaıdy paıdalanýǵa shaqyrdy. Tipti, olarǵa ózi qoldaý kórsetinin jetkizdi.

Aıta keteıik, buǵan deıin Aq úıdegi kezdesý barysynda Qazaqstan men AQSh prezıdentteri Izraıl Premer-mınıstri Benıamın Netanıahýmen telefon arqyly sóılesti.

Qasym-Jomart Toqaev pen Donald Tramp erkin formatta áńgimelesti.