Memleket basshysy Máýlen Áshimbaevty qabyldady
ASTANA. KAZINFORM – Memleket basshysy Senat tóraǵasy Máýlen Áshimbaevty qabyldady. Bul týraly Aqordanyń baspasóz qyzmeti habarlady.
Máýlen Áshimbaev Senattyń qazirgi qyzmeti men aldaǵy josparlary týraly málimet berdi.
Aıtýynsha, úshinshi sessııa bastalǵannan beri Parlament 28 zań qabyldaǵan, onyń beseýine depýtattar bastamashy bolǵan. Atap aıtqanda, Prezıdent joldaýlary men tapsyrmalaryn júzege asyrý maqsatynda turǵyn úı saıasatyna, bilim berý jáne balalar quqyǵyn qorǵaýǵa, bilim salasyndaǵy jınaqtaý júıesine, bırja saýdasy men kásipkerlikke, sot júıesin reformalaý men esirtkiniń zańsyz aınalymyna qarsy kúreske qatysty zańdar qabyldanǵan.
Qazir Parlamentte jumysshylardyń eńbek quqyqtaryn qorǵaý, kreatıvti ındýstrııany qoldaý, orman sharýashylyǵy jáne erekshe qorǵalatyn tabıǵı aýmaqtar jónindegi zań jobalary qaralyp jatyr. Bul – senatorlardyń bastamasymen qolǵa alynǵan qujattar.
Jyl basynan beri Senatta 50-ge jýyq is-shara ótkizilgenin, senatorlar Úkimetke 67 depýtattyq saýal joldaǵanyn aıtty. Sonymen qatar parlamentaralyq yntymaqtastyqty keńeıtý aıasynda 40-tan astam halyqaralyq kezdesý uıymdastyrylǵan.
Kelesi jyly joǵary Palatada Bıýdjet, Qurylys, Sý, Salyq kodeksteri, «Túrkistan qalasynyń erekshe mártebesi týraly» jáne «Tutynýshylardyń quqyǵyn qorǵaý týraly» zańdar qaralatynyn málimdedi. Sondaı-aq Jumysshy mamandyqtary jylyna arnalǵan parlamenttik tyńdaýlar ótkizý josparlanyp otyr.
Qazaqstannyń ornyqty damý salasyndaǵy ulttyq maqsattary men mindetterin iske asyrýdy monıtorıngteý jónindegi Parlamenttik komıssııanyń jumysy týraly aqparat berdi. Atalǵan komıssııa Memleket basshysynyń tapsyrmasymen qurylǵan bolatyn.
Prezıdenttiń óńirlerdi odan ári damytý jóninde júktegen mindetterin Palatanyń basymdyq beretin baǵyttarynyń biri ekenin atap ótti. Bul rette Senat máslıhattar depýtattarymen jumysty jandandyra túsken.
Álemdik jáne dástúrli dinder lıderleriniń VIII sezine daıyndyq barysyn baıandady.
Atalǵan jıyn 2025 jyldyń qyrkúıek aıyna josparlanyp otyr.
Prezıdent buǵan deıin Energetıka mınıstri Almasadam Sátqalıevti qabyldaǵan bolatyn.