Memleket basshysy Qaýipsizdik Keńesiniń otyrysyn ótkizdi
ASTANA. KAZINFORM – Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń ulttyq energetıkalyq júıeniń ornyqtylyǵyna arnalǵan otyrysy ótti, dep jazady Aqorda.
Jıynda Energetıka mınıstri Erlan Aqkenjenov, Sý resýrstary jáne ırrıgatsııa mınıstri Nurjan Nurjigitov jáne birqatar memlekettik organdardyń basshylary baıandama jasady.
Prezıdent energetıkalyq qaýipsizdik elimizdiń táýelsizdigi men ekonomıkalyq ornyqtylyǵyn qamtamasyz etetinin atap ótti.
Búginde Qazaqstannyń elektr qýatyn óndirýge qajetti resýrstary jetkilikti. Degenmen suranystyń udaıy artýy qýat kózderin utymdy ári ońtaıly paıdalanýdy talap etedi.
Keńeste otandyq elektr qýatyn qajettilikke qaraı ıkemdep óndirý máselesi qozǵaldy. Sonyń ishinde gaz generatsııasy, energııa saqtaý júıelerin damytý josparlarymen qatar gıdroenergetıkanyń áleýeti ózekti sanalady.
Memleket basshysynyń aıtýynsha, agrarlyq sektorǵa, ónerkásip pen ekonomıkanyń basqa da salalaryna sý únemdeý tehnologııalaryn keńinen engizý mańyzdy.
Sonymen qatar salanyń ǵylymı-tehnıkalyq jáne kadrlyq jaı-kúıine aıryqsha nazar aýdaryldy. Kásibı kadrlardy daıarlaý gıdroenergetıka baǵytyndaǵy ǵylymı-zertteý bazasyn damytý úshin de kerek.
Jıyn sońynda Úkimetke jáne óńir ákimderine otandyq energetıka júıesiniń turaqtylyǵyna qatysty máselelerdi jan-jaqty sheshý tapsyryldy.
Aıta kýeteıik, Qazaqstan halqy Assambleıasyn damytýdyń 2030 jylǵa deıingi tujyrymdamasy bekitildi.