Memleket basshysy Bınıamın Netanıahýmen telefon arqyly sóılesti
ASTANA. KAZINFORM – Izraıl tarapynyń bastamasymen Memleket basshysy Qasym-Jomart Toqaev Premer-mınıstr Bınıamın Netanıahýmen telefon arqyly sóılesti. Bul týraly Aqordanyń baspasóz qyzmeti habarlady.
Áńgimelesý barysynda Qazaqstan men Izraıl arasyndaǵy kópjyldyq jáne san qyrly yntymaqtastyq qarqyndy damyp kele jatqany atap ótildi.
Taraptar ekijaqty jáne kópjaqty kún tártibindegi máseleler boıynsha yqpaldastyqty odan ári arttyrýǵa nıetti ekenin rastady.
Budan bólek, Bınıamın Netanıahý Qazaqstannyń Ibrahım kelisimderine qosylýy týraly sheshimi úshin Qasym-Jomart Toqaevqa aıryqsha rızashylyǵyn bildirdi.
Izraıl Premer-mınıstri bul qadamdy beıbitshilik, turaqtylyq pen halyqaralyq dıalogty nyǵaıtý isindegi batyl ári kóregen sheshim retinde baǵalady.
Qasym-Jomart Toqaev pen Bınıamın Netanıahý baılanystardy jandandyrýǵa, sonyń ishinde joǵary deńgeıdegi saparlar uıymdastyrýǵa ýaǵdalasty.
Eske salsaq, budan buryn Parlamenttik reforma jónindegi jumys tobynyń tórtinshi otyrysy ótkenin jazǵanbyz.