Memleket áleýmettik mindettemelerin tolyq oryndap otyr – Máýlen Áshimbaev

ASTANA. KAZINFORM – Máslıhat depýtattary bıýdjetterdi bekitip qana qoımaı, olardyń oryndalýyn da jiti qadaǵalaýy qajet. Bul týraly búgin elordada Senat tóraǵasy Máýlen Áshimbaev málim etti.

- Qazirgi tańda Qazaqstan áleýmettik-ekonomıkalyq reformalardyń jańa kezeńine aıaq basty. Osy oraıda Prezıdentimiz qolǵa alǵan reformalardyń mánine qysqasha toqtalyp keteıin. Reformalardyń negizgi ózegi – keshendi damýdy qamtamasyz etý. Al, ekonomıkadaǵy jańa kezeńniń maqsaty – ártaraptandyrý, tehnologııalyq negiz, ashyqtyq pen ádilettilik arqyly sapaly ósimge qol jetkizý. Bizde áýelden munaıgaz jáne taý-ken salasy jaqsy damyǵanyn bilesizder.

Degenmen, qazirgi tańda Memleket basshysy ekonomıkanyń ózge salalarynyń úlesin arttyrýdy mindet etip júktep otyr. Byltyr elimizdiń ishki jalpy ónimi 288 mlrd dollarǵa jetti. Osy rette óńdeý salasynyń úlesi óndirýshi sektormen teńeskenin aıryqsha atap ótken jón. Bul barynsha ártarapty ekonomıkaǵa naqty qadam jasalyp jatqanyn kórsetedi. Bul jumysty ári qaraı jalǵastyrý qajet, - dedi M. Áshimbaev Senat janyndaǵy máslıhattarmen ózara is-qımyl jónindegi keńestiń keńeıtilgen otyrysynda.

Onyń aıtýynsha, qoıylǵan maqsatqa jetý úshin mashına jasaý, munaıgaz hımııasy, agroónerkásip kesheni, tsıfrlyq jáne «jasyl» tehnologııalardyń damýy jańa deńgeıge kóterilýge tıis. Sonymen birge, óńdeý sektoryna sapaly ınvestıtsııa tarta otyryp, ónim óndirý múmkindigi joǵary jumys oryndaryn qurý mańyzdy. Bul rette ortalyq organdar men óńirlerdiń arasyndaǵy úılesimdi jumysty qamtamasyz etý qajet. Osy jumystar aıasynda máslıhattar qolaıly ınvestıtsııalyq jaǵdaı qalyptastyrýǵa jáne kedergilerdi joıyp, ekonomıkalyq jobalarǵa kómek kórsetýge belsendi qatysýy kerek.

- Prezıdenttik reformalardyń kelesi bir baǵyty – áleýmettik salany damytýǵa da máslıhat depýtattaryn jumyldyrý asa mańyzdy. Memleket basshysy atap ótkendeı, bıýdjet qarajaty azamattardyń ómir súrý sapasyna tikeleı áser etetin maqsattarǵa baǵyttalýy kerek. Bıýdjettegi qıyndyqtarǵa qaramastan, memleket óziniń barlyq áleýmettik mindettemelerin tolyq oryndap otyr. Jyl saıyn zeınetaqy men járdemaqyǵa ındeksatsııa jasalady. Shákirtaqy men bıýdjettik uıym qyzmetkerleriniń jalaqysy da ósip keledi. Áleýmettik ınfraqurylymdy damytý baǵyty boıynsha Memleket basshysynyń tapsyrmasyna sáıkes «Jaıly mektep» ulttyq jobasy iske asyrylýda. Bıyl 200-ge jýyq mektep ashylady. Úsh jyldyń ishinde 1300 mektep jańǵyrtylady. Aýyldyq jerlerdegi densaýlyq saqtaý jónindegi ulttyq jospar aıasynda sońǵy jyldary 263 medıtsınalyq nysan boı kóterdi. Bıyl jyl sońyna deıin osyndaı taǵy 188 nysan paıdalanýǵa beriledi, - dedi Senat spıkeri.

Onyń sózine qaraǵanda, bul rette jol, balabaqsha, mektep, turǵyn úı-kommýnaldyq sharýashylyq jáne áleýmettik ınfraqurylym qurylysy men olardy jóndeý jumystaryna monıtorıng júrgizýdiń máni zor. Máslıhat depýtattary bıýdjetterdi bekitip qana qoımaı, olardyń oryndalýyn da jiti qadaǵalaýy qajet.

Budan buryn habarlanǵandaı, búgin elordada Senat janyndaǵy máslıhattarmen ózara is-qımyl jónindegi keńestiń keńeıtilgen otyrysy ótip jatyr.