Memleket 1 tonna plastık qaldyqqa qansha sýbsıdııa tóleıdi
ASTANA. KAZINFORM — «Jasyl damý» AQ basqarma tóraǵasy Erjan Sársenbaı ortalyq kommýnıkatsııalar qyzmetinde ótken brıfıngide memleket plastık qaldyqty óńdeıtin kásiporyndarǵa qansha sýbsıdııa tóleıtinin aıtty.
«Bıyl 1 tonna plastıkalyq qaptamaǵa 67 379 teńge tólenedi. Onyń ishinde alym — 33,4 myń teńge, tasymaldaý — 27,3 myń teńge, al qaıta óńdeý — 6,6 myń teńge. 2024 jyly bul maqsatqa (jalpy turmystyq qaldyqty qaıta óńdeýge — red.) 7,6 mlrd teńge josparlanǵan. Jańa aıtqanymdaı, tólemderdiń búkil tarıfi naqty belgilengen», — dedi Erjan Sársenbaı.
Sondaı-aq, ol qoqys óńdeý jobalaryna arnaıy qor arqyly 3 paıyzdyq nesıe beriletinin aıtty.
«Qosymsha qaldyqty jınaý jáne qaıta óńdeý tehnologııalaryn engizýge, qaıta óńdeıtin zaýyt salýǵa, uıymdardyń materıaldyq-tehnıkalyq bazasyn jetildirýge arnalǵan jobalarǵa 200 mlrd teńge bólý josparlanǵan. Qarjylandyrý „Ónerkásipti damytý qory“ arqyly 3 paıyzdan aspaıtyn jyldyq syıaqy mólsherlemesimen 3 jyldan 15 jylǵa deıingi merzimde qaıtarý mehanızmimen iske asady», — dedi aktsıonerlik qoǵam basshysy.
