Mektepterde stomatologııa kabınetterin ashýǵa ne sebep boldy

ASTANA. KAZINFORM – Elimizde bıyl jyl sońyna deıin mektepterde 195 stomatologııa kabıneti ashylady. Bul týraly «Jibek joly» telearnasyndaǵy «Búgin LIVE» baǵdarlamasynda professor, Balalar jáne ortopedııalyq stomatologııa kafedrasynyń meńgerýshisi Ardaq Eslıamǵalıeva aıtty.

— QR Densaýlyq saqtaý mınıstrliginiń «Bolashaqqa saý tispen» baǵdarlamasy aıasynda balalardyń aýyz qýysy densaýlyǵyn jaqsartý úshin mektepterde statsıonarlyq-stomatologııalyq kabınetter ashylyp jatyr. Qazir Aqtóbe, Atyraý, Qaraǵandy, Jetisý, Almaty, Jambyl oblystarynda ashyldy. 2025 jyly el boıynsha osyndaı 195 kabınet ashý josparlanǵan, - dedi ol.

Mamannyń aıtýynsha, 2016 jyly 15 jastaǵy jasóspirimderde tis qurtynyń taraýy 75 paıyz bolsa, 2021 jyly — 86, 2024 jyly 87 paıyzǵa jetken.

— QR densaýlyq saqtaý mınıstrligi men Oqý-aǵartý mınıstrligi birlese jumys istep jatyr. Elimizde oqýshy sany 1000-nan asatyn 1007 meketp bar eken. DDSU talaby boıynsha oqýshy sany myńnan asqan mektepte osyndaı kabınetter ashylýy tıis. 2024-2028 jyldar aralyǵynda elimizde osyndaı 987 mektepte tis emdeý kabınetin ashý josparlanǵan, - dedi Ardaq Eslıamǵalıeva.

Aıta keteıik, buǵan deıin mektepterde 1 myńnan astam stomatologııa kabıneti ashylatynyn habarlaǵan edik.