Mektepke deıingi daıyndyq: Bala qandaı daǵdylardy meńgeredi
ASTANA. KAZINFORM — Qazaqstanda mektepaldy daıarlyq toptary men synyptaryna qatysty qoǵamda qyzyǵýshylyq jyldan jylǵa artyp keledi. Alaıda bul daıarlyq deńgeıi elimizdegi barlyq mektep pen balabaqshalarda birdeı uıymdastyrylmaǵan.
Mektepaldy daıarlyq synyptary men toptarynyń qalaı jumys isteıtini jaıly Mektepke deıingi bilim berý departamentiniń dırektory Manara Adamova «Jibek joly» telearnasyndaǵy «Búgin LIVE» baǵdarlamasynda málimdedi.
Mamannyń aıtýynsha, mektepaldy daıarlyq tek mektep janyndaǵy synyptarda ǵana emes, balabaqsha janyndaǵy toptarda da uıymdastyrylady.
— Qazirgi ýaqytta elimizde 12 myńǵa jýyq balabaqsha bar, olardyń kópshiliginde mektepaldy daıarlyq toptary jumys isteıdi. Sonymen qatar ata-analar tarapynan suranys bolǵan jaǵdaıda mektep janynan da arnaıy synyptar ashylady, — dedi ol.
Sondaı-aq Manara Adamova mektepaldy daıarlyq toby men synybynyń arasyndaǵy aıyrmashylyqtarǵa da toqtalyp ótti.
— Balabaqshadaǵy daıarlyq tobyna bala tańerteńnen keshke deıin qatysa alady. Al mekteptegi synyp nusqasy — mektep formatynda, ıaǵnı shamamen 4 saǵat kóleminde bilim beredi. Bul mektepke beıimdelý kezeńi, — dedi ol.
Budan bólek, mektepaldy daıarlyq synyptarynyń ashylýy birneshe faktorǵa baılanysty ekeni de aıtyldy. Ata-analar tarapynan suranys túsip, synypqa qajetti bala sany jınalǵan jaǵdaıda synyp ashylady. Alaıda iri qalalar men megapolısterde bastaýyshqa synyptar jetispeýshiligine baılanysty mektepterde mektepaldy daıarlyq synyptaryn ashý múmkin bolmaı qalýy yqtımal.
— Basqa jaǵdaıda, zańdy túrde eshqandaı kedergi joq. Eger ata-anadan ótinish tússe, jergilikti atqarýshy organ men mektep ákimshiligi tarapynan mektepaldy daıarlyq synybyn ashý mindetti, — dedi departament dırektory.
Mektepaldy daıarlyqtyń mazmunyna da erekshe mán berildi. Mamannyń aıtýynsha, qazirgi daıarlyq júıesi burynǵyǵa qaraǵanda anaǵurlym mazmundy ári naqty baǵyttarǵa negizdelgen.
— Qazir mektepke qabyldaý jasy 6 jas bolyp belgilengendikten, daıarlyq toptarynda 5 jastaǵy balalar oqıdy. Munda balanyń baılanystyryp sóıleý daǵdysy, sózdik qory, kommýnıkatıvtik qabileti, áleýmettenýi damytylady. Sonymen qatar dybystardy taný, áripterdi vızýaldy túrde ajyratý, 20-ǵa deıin sanaý, geometrııalyq fıgýralardy tanyp-bilý sııaqty negizgi daǵdylar qalyptasady. Eń mańyzdysy balanyń qolyn jazýǵa daıyndaý, — dedi Manara Adamova.
Mamannyń aıtýynsha, mektepaldy daıarlyqtyń basty maqsaty balanyń mektepke beıimdelýi men oqý daǵdylaryn qalyptastyrý. Bul kezeńde bala jazýǵa, oqýǵa alǵashqy qadam jasap qana qoımaı, ujymda jumys isteýdi, tártipke baǵynýdy, adamgershilik qasıetterdi boıyna sińiredi.
Aıta keteıik, oqýshylardy mektepke daıyndaý úshin ata-analarǵa shamamen 20 mlrd teńge aýdaryldy.