Mektep joq, lıft jıi synady: Semeı turǵyndaryn tolǵandyrǵan máseleler qandaı
SEMEI. KAZINFORM — Semeı qalasyndaǵy Qaraǵaıly yqshamaýdany — kópqabatty úıler kóptep salynyp jatqan aýdan. Alaıda sol jaqqa kóship barǵan halyqqa qanshalyqty jaǵdaı jasalǵan? Kazinform redaktsııasyna habarlasqan aýdan turǵyndary birneshe máseleni kóterdi.
«Balany qalanyń ár buryshyna tasımyz»
Qaraǵaıly yqshamaýdany Semeıdegi eń negizgi, ortalyq aýdan deýge bolady. Sebebi qaladaǵy qurylys jumystarynyń basym bóligi osynda júrip jatyr. Alaıda áli kúnge deıin yqshamaýdanda mektep joq. Bul turǵyndarǵa qolaısyzdyq týdyryp otyr.
— Abaı oblysy Shyǵys Qazaqstannan bólinip, jeke óńir bolǵan soń Semeı onyń ortalyǵyna aınaldy. Sol kezde qalaǵa kóship kelgender Qaraǵaılydan úı alyp jatty. Áli de oblystyń ár aýdanynan shaharǵa bet buratyndar osy jaqqa qonystanýdy qalaıdy. Dese de bizdegi ózekti másele — mekteptiń joqtyǵy. Halyq kúnde tańerteń balalaryn qalanyń ár buryshyna tasyp júrýge májbúr. Bul óte yńǵaısyz, — deıdi aty-jónin atamaýdy ótingen yqshamaýdan turǵyndary.
Jalpy aýdany 295,2 gektardy quraıtyn Qaraǵaılyda 227 kópqabatty úı bar. Bul úılerde 35,6 myń adam turady. Osynshama adam búldirshinderin jar degende jalǵyz balabaqshaǵa syıdyra almaı álek.
— Bizde tek bir balabaqsha bar. Ondaǵy bala sany birden tolyp qoıǵan. Qalǵandary perzentterin basqa jaqtaǵy balabaqshalarǵa tasıdy. Bul negizgi yqshamaýdan bolǵandyqtan nege osy másele sheshilmeı keledi? — dep narazylyǵyn bildirdi jergilikti jurt.
Odan bólek, kópqabatty úılerdiń lıfteri jıi synatyn kórinedi. Sonyń saldarynan zeınetkerler men qolyna balasyn kótergen analar bıik qabatqa baspaldaqpan kóterilip, qara sorpa bolyp terleıdi.
— Yqshamaýdanda azyq-túlik satatyn dúken joqtyń qasy. Keshke jumystan qaıtyp kele jatyp nan, sút alý úshin alystaý jerdegi dúkenge barý úshin biraz ýaqyt jaıaý sabylamyz. Bizdiń osy máselelerimiz tezirek sheshimin tapsa eken deımiz, — deıdi turǵyndar.
900 oryndyq mektep salynady
Kazinform tilshisi kóptiń kókeıindegi túıtkilderdiń jaýabyn bilý úshin qala ákimdigindegi quzyrly bólimderge habarlasyp kórdi.
Sáýlet jáne qala qurylysy bólimi basshysynyń mindetin atqarýshy Erlan Meketaevtyń aıtýynsha, Qaraǵaıly yqsham aýdanynda «Nazarbaev Zııatkerlik mektebi», 5600 oryndyq «Abaı Arena» mádenı-sport kesheni, 150 oryndyq ońaltý ortalyǵy jáne 320 oryndyq balabaqsha ornalasqan.
— Aýdan sý burý, telekommýnıkatsııa, sýmen, jylýmen jáne elektrmen jabdyqtaýdyń magıstraldyq jelilerimen tolyqtaı qamtamasyz etilgen. 2025 jyly «Samuryq-Qazyna» AQ jelisi boıynsha 1200 oryndyq jaıly mekteptiń qurylysyn aıaqtaý josparlanǵan. Sondaı-aq jobada tórt jalpy bilim beretin mekteptiń (Úsheýi — 1200 oryndyq jáne 1 — 900 oryndyq), bes balabaqshanyń (1 — 140 oryndyq, 1 — 240 oryndyq, 3 — 320 oryndyq), muz saraıynyń, sporttyq-saýyqtyrý kesheniniń, emhananyń, nevrologııalyq ortalyqtyń, ákimshilik-iskerlik ortalyqtyń qurylysy kózdelgen. Budan bólek, oıyn-saýyq ortalyqtary, órt sóndirý deposy, áleýmettik jáne ózge de obektilerde kólik qoıýǵa arnalǵan ashyq jáne jabyq parkıngter salynady, — deıdi ol.
Turǵyn úı qurylysy da jalǵaspaq. Qazirgi ýaqytta yqsham aýdanda salynatyn 54 kópqabatty úıdiń jobalyq-smetalyq qujattamasy ázirlenip jatyr eken.
4 lıft aýystyrylǵan
Al lıft máselesi qatysty turǵyn úı qatynastary jáne turǵyn úı ınspektsııasy bóliminen jaýap berdi.
— Turǵyndar tarapynan jedelsatylardyń aqaýy týraly aryzdar túskenin jáne osy turǵyda kondomınıým obektisiniń ortaq múlkine kúrdeli jóndeý júrgizý boıynsha bıýdjettik kredıtteý baǵdarlamasy «Semeı qalasynyń aýmaqtyq basqarý jáne turǵyn úı qorynyń ortalyǵy» KMM mekemesimen júzege asyrylyp jatqanyn habarlaımyz. Búginde Semeı qalasy boıynsha atalmysh baǵdarlama arqyly 4 jedelsaty aýystyrylǵan, — deıdi bólim basshysy Dıana Shaıahmetova.
Onyń aıtýynsha, jedelsaty aýystyrǵysy kelgen azamattar ótinish jazyp, myna qujattardy ótkizýi tıis:
1) Turǵyn úı qatynastary týraly zańnyń 42-babyna sáıkes basqarý organyn — PIK (páter ıeleri kooperatıvi), MIB (múlik ıeleriniń birlestigi), úı keńesi, jaı seriktestiktiń senim bildirilgen adamy) saılaý týraly úı ıeleriniń jalpy jınalysynyń hattamasy;
2) Kondomınıým obektisiniń ortaq múlkine kúrdeli jóndeý júrgizý týraly sheshim qabyldaý boıynsha úı ıeleriniń jalpy jınalysynyń hattamasy. Sheshim úı ıeleriniń jalpy sanynyń 2/3-ten astam daýysy bolǵan kezde qabyldandy dep esepteledi;
3) Úıdiń tehnıkalyq pasporty (kireberis alańy, jertóle jáne t.b);
4) Páter ıeleriniń tehnıkalyq pasportyna sáıkes paıdaly alań týraly málimetter;
5) Jyljymaıtyn múlik pen múlikke tirkelgen quqyǵy týraly anyqtama;
6) «Turǵyn úı qatynastary týraly» QR Zańynyń 32-babyna sáıkes jaı seriktestiktiń senim bildirilgen tulǵasy úshin birlesken qyzmet týraly shart.
— Zańǵa sáıkes, páter ıeleri jalpy jınalysta kondomınıým obektisiniń ortaq múlkine kúrdeli jóndeý (jańǵyrtý, rekonstrýktsııalaý, restavratsııalaý) júrgizý týraly sheshim shyǵarýy qajet. «Kondomınıým obektileriniń ortaq múlkine kúrdeli jóndeý júrgizý tártibin bekitý týraly» 1-taraýdyń 4-tarmaǵyna sáıkes jergilikti atqarýshy organnyń bıýdjet qarajaty bolǵan kezde jınalys sheshiminiń negizinde páter ıeleriniń qarajattyń qaıtarylýyn qamtamasyz etý shartymen jedelsatylardy jóndeýdi, aýystyrýdy nemese ornatýdy júzege asyrady. Tıisinshe, jergilikti atqarýshy organ bıýdjettik kredıt jáne turǵyn úı qaryzy sheńberinde qarajattyń qaıtarylýyna monıtorıng pen baqylaýdy qamtamasyz etedi. Osy baǵdarlamaǵa qatysty suraqtaryńyz bolsa Semeı qalasy Uranhaev kóshesi, 53 úı, 1-qabat mekenjaıy boıynsha kelseńizder, ne bolmasa 8(7222)-35-55-06 telefon nómirine habarlassańyzdar bolady, — dep túsindirdi Dıana Shaıahmetova.
Eki pavılon qoıylmaq
Kásipkerlik bóliminiń basshysy Erkebulan Nakıpovtyń aıtýynsha, qazirgi ýaqytta Qaraǵaıly shaǵyn aýdanynda «Aqshyn market», «Norma 2» mınımarketi, «Et ónimderi» dúkeni jumys istep tur.
Sondaı-aq áeýmettik mańyzy bar azyq-túlik taýarlaryn satý boıynsha «Semeı „ÁKK“ AQ-nyń 2 fırmalyq pavılony ornalasqan.
— Aldaǵy ýaqytta yqshamaýdanda «Semeı „ÁKK“ AQ turaqtandyrý qorynan bakaleıa jáne jemis-kókónis ónimderin satatyn eki pavılon qoıý josparlanyp otyr. Budan bólek, dúken ashýǵa nıet bildirgen kásipkerlerge túsindirý jumystary júrgizilýde, — deıdi ol.
P. S. Qaraǵaıly halqyn tolǵandyrǵan máseleler aldaǵy ýaqytta birtindep sheshimin tabatyn sekildi. Bıyl bir mektep paıdalanýǵa berilmek. Aldaǵy ýaqytta balabaqshalar salyp, dúken de ashý josparlanyp otyr. Másele Kazinform tilshileriniń baqylaýynda bolady.
Eske salsaq, osyǵan deıin «Taza qala» jobasy Semeıdiń tazalyǵyn teksergeni habarlanǵan.
