Mektep muǵalimderi aǵylshyn tilin bilýge mindettele me

ASTANA. QazAqparat - Bilim jáne ǵylym mınıstrliginiń ókili mektep muǵalimderin, sonyń ishinde egde jastaǵy ustazdardy aǵylshyn tilin meńgerýge mindetteý máselesi boıynsha suraqqa jaýap berdi, dep xabarlaıdy QazAqparat tilshisi.

«Biz mektep muǵalimderin qala nemese aýyl dep bólmeımiz. Kim úırengisi keledi, sol adamdy kýrstarǵa qabyldaımyz. Eń bastysy, aǵylshyn kýrstaryna qatysý, ıa qatyspaý, ol adamnyń óz erki bolýy qajet. Máselen, bıyl kýrstarǵa jazylý úshin mindetti túrde muǵalimniń óz ótinishi bolýy kerek. Ol ótinishte muǵalim «men óz erkimen kýrstarǵa baramyn, odan keıin kýrs boıynsha berilgen barlyq talaptarmen kelisemin, osy kýrsty bitirgennen keıin men aǵylshyn tilinde osy pánderdi júrgizemin» degen naqty kelisim bolýy qajet. Osyndaı sharttar oryndalǵan kezde ǵana biz muǵalimderdi aǵylshyn kýrstaryna jiberemiz», - dedi QR Bilim jáne ǵylym vıtse-mınıstri Asxat Aımaǵambetov Úkimet otyrysynan keıingi baspasóz máslıxatynda.

Onyń aıtýynsha, mınıstrlikke aǵylshyn tilin úırenýge mindetteý boıynsha aryz-shaǵymdar túsken joq, kerisinshe, egde jastaǵy ustazdardyń ózderi arnaıy daıyndyq kýrstaryna suranyp otyr.

«Keshe ǵana bizge bir shaǵym tústi. Sol shaǵymda muǵalim mınıstrdiń atyna óz máselesin jazdy.

«Meniń jasym 56-da deıdi. Men aǵylshyn tilin oqý úshin arnaıy kýrsqa baraıyn dep edim. Biraq oblystyq bilim basqarmasy meniń ótinishimdi qabyldamaı otyr» degen shaǵym túsip jatyr. Jalpy, 2019 jylǵa deıin biz muǵalimderdi daıyndaýymyz qajet. Ekinshiden, oqýlyqtar, úshinshiden, ádistemeni ázirleýimiz kerek. Tórtinshiden, balalardyń ózderi de daıyn bolýy shart. Sebebi 2019 jyldan bastap 10-11 synypta keıbir pánder aǵylshyn tilinde oqytylady», - dep atap kórsetti A.Aımaǵambetov.

Aıta keteıik, Úkimettiń búgingi otyrysynda mınıstr Erlan Saǵadıev muǵalimderdiń attestatsııasyn ótkizetini týraly aıtty.  Jańa júıege sáıkes, buǵan deıingi ústameaqylardyń barlyǵy saqtalady.