Mektep qabyrǵasynan bastap qarjylyq saýattylyqty arttyrý qajet – «Qaryzsyz qoǵam» jobasy
ASTANA. KAZINFORM – «AMANAT» partııasy «Qaryzsyz qoǵam» jobasy aıasynda muǵalimderdi qarjylyq saýattylyqty oqytý daǵdylaryna úıretýdi uıymdastyrdy. El boıynsha barlyǵy 7500 mektep, kolledj jáne ýnıversıtet muǵalimderi oqytylady. Jospar boıynsha jańa pán jańa oqý jylynda oqý baǵdarlamasyna engizilmek.
Astanada oqý semınarynyń qatysýshylarymen Májilis Spıkeri, «AMANAT» partııasynyń Tóraǵasy Erlan Qoshanov, Ǵylym jáne joǵary bilim mınıstri Saıasat Nurbek jáne Oqý-aǵartý mınıstri Ǵanı Beısembaev kezdesti. Májilis Spıkeriniń aıtýynsha, muǵalimder árdaıym qoǵamdaǵy jańa jáne progressıvti bastamalardyń negizgi nusqaýshysy. Sondyqtan pedagogterdiń qarjylyq saýattylyq boıynsha jańa pánniń mánin túsinýi jáne jastardy oqytýy mańyzdy.
– Ózderińiz biletindeı, Memleket basshysy Qasym-Jomart Toqaev óziniń halyqqa Joldaýynda qarjylyq saýattylyqty arttyrý boıynsha «Qaryzsyz qoǵam» jobasyna erekshe nazar aýdardy. Prezıdent Úkimetpen birlesip bul bastamany jalpyulttyq jobaǵa aınaldyrýdy jáne onyń aýqymyn keńeıtýdi tapsyrdy. Bul jumysty eń aldymen mektep pen JOO-dan bastaý kerek. Bizdiń Prezıdentimizdiń negizgi saıasaty – reformalardy halyq úshin jáne halyqpen birge júrgizý. Sondyqtan biz, sizderdi, muǵalimderdi shaqyryp, qarjylyq saýattylyqty arttyrý boıynsha jumys istegimiz keledi, – dedi ol.
Májilis Spıkeri búgingi otandyq bilim berý júıesi óskeleń urpaqqa eń qajetti bilimdi berip, olardy qazirgi ómirge barynsha daıyndaýy tıis ekenin erekshe atap ótti. Bul aldyńǵy qatarly sheteldik elderdiń tájirıbesi.
Ol sondaı-aq memleket halyqtyń qaryz júktemesin azaıtý boıynsha júıeli sharalar qabyldap jatqanyn tilge tıek etti. Prezıdenttiń tapsyrmasy boıynsha Májilistegi «AMANAT» partııasy fraktsııasy halyqtyń nesıelik júktemesin azaıtýǵa baǵyttalǵan jańa zań jobasyn ázirledi. Bul zań birinshi kezekte azamattardyń múddelerin qorǵaýǵa baǵyttalǵan.
Partııa hatshysy Eldar Jumaǵazıevtiń aıtýynsha, 2024 jyly qarjylyq saýattylyqty 100 myń stýdent jáne 450 myń oqýshy oqıdy. Qosymsha 200 myń adam oqytý kýrstarynan ótedi. Osylaısha, bıyl «Qaryzsyz qoǵam» jobasymen 750 myń adam qamtylady.
«Qaryzsyz qoǵam» jobasynyń ádiskerler jumys tobynyń jetekshisi Alma Doşanova 600 myń muǵalim, oqýshy jáne olardyń ata-analary arasynda arnaıy saýalnama júrgizilgenin aıtty. Zertteý nátıjeleri boıynsha, saýalnamaǵa qatysqan oqýshylardyń 60%-y qarjylyq saýattylyqtyń mańyzdylyǵyn atap ótti. Bul bastamany ata-analar tarapy da qoldaıdy, 78% respondent balalarynyń qarjylyq saýattylyqty oqýǵa qyzyǵýshylyq tanytqanyn aıtady. Ádisker-jobalaýshy Nazym Bekjigittiń pikirinshe, qarjylyq saýatty azamat eldiń damýyna negiz bolady.
Semeı qalasynyń №5 gımnazııa muǵalimi Saıramgúl Jumadilovanyń pikirinshe, qazirgi ýaqytta smartfonnyń kómegimen nesıe rásimdeýge bolatyn tsıfrlyq dáýirde balany qarajatty basqarýǵa, josparlaýǵa jáne shyǵyndardy esepteýge úıretý óte mańyzdy.
– Mektepterdegi qarjylyq saýattylyq oqytý mańyzdy, óıtkeni ol balalardy aqshany basqarýǵa úıretedi: bıýdjet qurý, únemdeý jáne aqshaǵa jaýapty bolý. Qaryzdar men alaıaqtyqtan aýlaq bolýǵa, kásipkerlik daǵdylardy damytýǵa jáne bolashaqqa degen senimdilikti arttyrýǵa kómektesedi. Bul bilim paıdaly jáne qarjylyq turǵyda turaqty qoǵam qurýǵa kómektesedi, - dedi ol.
Kezdesý sońynda Oqý-aǵartý men Ǵylym jáne joǵary bilim mınıstrleri Ǵanı Beısembaev pen Saıasat Nurbek «Qaryzsyz qoǵam» jobasynyń joǵary ózektiligine toqtalyp, ony bilim berýdiń úsh deńgeıinde – mektepterde, kolledjderde jáne ýnıversıtetterde tolyq qoldaıtynyn aıtty. Atap aıtqanda, qarjylyq saýattylyq boıynsha mektep olımpıadalary ótkiziledi. Osy pándi oqytý qarqyny artady. Ol búkil el boıynsha, ásirese ekonomıkamen baılanysty emes mamandyqtar úshin barlyq joǵary oqý oryndarynda mindetti bolady.
Eske sala keteıik, «Qaryzsyz qoǵam» jobasy byltyr 2 mamyrda bastalǵan bolatyn. Jobany iske asyrý barysynda 150 myńǵa jýyq adam oqýdan ótti. Oqý kýrsynyń qatysýshylaryna yńǵaıly bolý úshin qogamfin.kz. onlaın-platformasy ázirlendi. Saıt arqyly oqýǵa jazylyp, paıdaly materıaldar men beıne sabaqtardy júktep alýǵa bolady.
