Mektep formasyna dinı kıim elementin qosýǵa ruqsat berilmeıdi – Atyraý bilim basqarmasy

ATYRAÝ. QazAqparat – Mektep formasyna dinı kıim elementin qosýǵa jol berilmeıdi, dep habarlaıdy QazAqparat tilshisi.

Áleýmettik jelide Atyraýdaǵy oqýshy qyzdardyń mektepte oramal taǵy máselesin ata-analar komıeti sheshýi múmkin degen aqparat tarady.

Alaıda, oblystyq bilim basqarmasynyń baspasóz qyzmeti bul aqparatty joqqa shyǵardy.

«Mektep formasyna ártúrli konfessııalarǵa qatysty dinı aǵymnyń kıim elementterin qosýǵa jol berilmeıdi. Óıtkeni, Qazaqstan Respýblıkasy Bilim jáne ǵylym mınıstriniń 2016 jylǵy 14 qańtardaǵy «Orta bilim berý mekemeleri úshin mindetti mektep formasyna qoıylatyn talaptardy bekitý týraly» №26 buıryǵynda ártúrli dinı birlestikter kıiminiń elementterin mektep formasyna qosýǵa ruqsat etilmeıdi delingen. Osy buıryqqa sáıkes orta bilim berý uıymdarynyń jalpyǵa mindetti mektep formasy bilim berýdiń zaıyrly sıpatynda bolýy kerek. Mektep formasynyń stıli, túsi klassıkalyq úlgide, bir tústi gammada, úsh tústi aralastyrýdan aspaıdy. Ata-analar komıeti, qamqorshylar keńesi, mektep ákimshiligi osy buıryqty basshylyqqa alady», -dedi Erlan Slambekov.

Onyń aıtýynsha, áleýmettik jelide mektep formasyn engizý úshin ata-analar komıteti sheshim qabyldaıdy degen aqparat shyndyqqa janaspaıdy.

Eske sala ketelik, budan buryn birneshe mekteptiń oqýshylary jóndeý jumysyna baılanysty ózge bilim ordasynda oqıtynyn jazǵan edik.

Keıin oblys ákimi oqýshylardy tasymaldaıtyn 23 avtobýs satyp alýǵa 1,1 mlrd teńge bólingenin málim etti.

Sondaı-aq, bastaýysh synyp oqýshylaryn ystyq tamaqpen qamtýǵa 6,6 mln teńge qaralǵanyn habarlaǵan edik.