Mektep bitirýshilerge UBT sertıfıkatymen birge arnaıy aqparattyq paraq beriledi
«Buryn mektep bitirýshiler testileýdi tek maýsym aıynan bastap tapsyrsa, bıyl túlekter qańtar jáne naýryz aıynan bastap tapsyrdy. Sondyqtan, osy testileýge oqýshylarymyz jaqsy psıhologııalyq daıyndyqpen kelip otyr dep aıta alamyz. Qańtardaǵy testileýge 35 myńǵa jýyq, al naýryzda 80 myńdaı oqýshy qatysty. Osy eki UBT-da jalpy mektep bitirýshilerdiń 78 paıyzy qamtyldy. Onyń 70 paıyzy qazirdiń ózinde aqyly negizde oqýǵa túse alady», - dedi mınıstr Úkimet otyrysynda.
Asha Aımaǵambetovtyń aıtýyna qaraǵanda, osy oqýshylardyń grantqa túsem degenderi maýsym aıynda testileýge qatysyp, óz bilimin synaı alady.
«Ekinshiden, kolledj túlekterine de jeńildikter jasaldy. Olar bitirgen mamandyǵy boıynsha joǵarǵy oqý oryndaryna aqyly negizde oqýǵa túsem dese, UBTdan bosatylyp, tek emtıhan tapsyrady. Úshinshiden, «IELTS» halyqaralyq sertıfıkaty bar túlekter «shet tili» páni boıynsha testileýden bosatylady. Olarǵa pán boıynsha maksımaldy bal (40 bal) avtomatty túrde beriledi. UBT-ǵa qatysýshylardyń arasynda mundaı balalar sany - 708. Tórtinshiden, ár bitirýshige UBT sertıfıkatymen birge arnaıy aqparattyq paraq beriledi. Onda mamandyqtar tizimi, oǵan sáıkes bólingen grant sany, sondaı-aq ótken jylǵy grant konkýrsynyń nátıjeleri, ıaǵnı ótý baly kórsetiledi», - dedi mınıstr.
Ashat Aımaǵambetovtyń sózine súıensek, bul talapkerlerge bolashaq mamandyǵyn durys jáne alǵan ball deńgeıine sáıkes tańdaýǵa múmkindik beredi.
«Besinshiden, osy jyly grant bilim baǵdarlamalarynyń toptary boıynsha beriledi. Grantqa qujat tapsyrǵanda talapker bilim baǵdarlamalarynyń toby boıynsha ótinish beredi. Al grant jeńip alǵannan keıin oqý ornyn jáne sol toptyń ishindegi naqty baǵdarlamany tandaıdy. Mysaly, «Aqparattyq tehnologııalar» tobynyń ishinde «Informatıka», «Aqparattyq júıeler», «Big data» jáne taǵy basqa naqty bilim berý baǵdarlamasyn tańdaı alady. Bul - óte yńǵaıly», - dedi Ashat Aımaǵambetov.
