Saqtandyrylmaǵan qazaqstandyqtar qandaı medıtsınalyq kómekti tegin ala alady
ASTANA. KAZINFORM – Qazaqstan turǵyndary medıtsınalyq kómekti mindetti áleýmettik medıtsınalyq saqtandyrý (MÁMS) jáne memlekettik tegin medıtsınalyq kómektiń kepildik berilgen kólemi (TMKKK) aıasynda ala alady. Bul tizimge naqty ne kiretinin Áleýmettik medıtsınalyq saqtandyrý qory túsindirdi, dep jazdy Astana qalasy ákimdiginiń resmı saıty.
TMKKK bıýdjet qarajaty esebinen usynylady. Ony Qazaqstan Respýblıkasy azamattary, qandastar, bosqyndar, sheteldikter jáne QR aýmaǵynda turaqty turatyn, yqtııarhaty bar azamattyǵy joq tulǵalar paıdalana alady. Al el aýmaǵynda ýaqytsha turyp jatqan sheteldikter men azamattyǵy joq adamdar, sondaı-aq baspana izdegen tulǵalar TMKKK-ge tek aınalasyna qaýip tóndiretin aýrýlar kezinde ǵana júgine alady.
– Kópshilik saqtandyrylǵan mártebesi bolmasa, emhanada qabyldamaıdy dep qate oılaıdy. Alaıda MÁMS júıesindegi mártebesine qaramastan kórsetiletin medıtsınalyq qyzmetter tizimi bar, – dedi ÁMSQ basqarma tóraǵasynyń orynbasary Indıra Sárkenova.
TMKKK aıasynda mynandaı qyzmetter kórsetiledi:
1. Jedel medıtsınalyq kómek: jedel járdem brıgadasyn shaqyrýdan bólek, sanıtarlyq avıatsııa qyzmetteri de kiredi;
2. Bastapqy medıtsınalyq-sanıtarlyq kómek: ýchaskelik dárigerdiń (VOP, terapevt, pedıatr, medbıke) qabyldaýy, keń taralǵan aýrýlardy dıagnostıkalaý, emdeý jáne basqarý, maqsatty toptar arasynda profılaktıkalyq tekserýler, ımmýnalandyrý, aýrýlardyń minez-qulyqtyq qaýip faktorlaryn erte anyqtaý jáne monıtorıngteý, salaýatty ómir saltyn qalyptastyrý jáne nasıhattaý, reprodýktıvti densaýlyqty qorǵaý sharalary, júkti áıelder men bosanǵan áıelderdi bosanǵannan keıingi kezeńde baqylaý;
3. Ambýlatorııalyq jaǵdaıda mamandandyrylǵan medıtsınalyq kómek: VICh-ınfektsııasy men týberkýlezdiń aldyn alý jáne dıagnostıkasy, áleýmettik mańyzy bar jáne sozylmaly aýrýlardy dıagnostıkalaý men emdeý, jaraqattar, ýlaný nemese basqa da shuǵyl jaǵdaılar kezindegi qyzmetter;
4. Statsıonardy almastyratyn jaǵdaılarda mamandandyrylǵan medıtsınalyq kómek: áleýmettik mańyzy bar jáne sozylmaly aýrýlary bar adamdarǵa arnalǵan kúndizgi statsıonar qyzmetteri;
5. Statsıonarlyq jaǵdaıda mamandandyrylǵan medıtsınalyq kómek: shuǵyl kórsetkishter boıynsha gospıtalızatsııa, statsıonardyń qabyldaý bóliminde shuǵyl gospıtalızatsııa kezinde emdeý jáne dıagnostıka, áleýmettik mańyzy bar jáne sırek kezdesetin (orfandyq) aýrýlar kezinde josparly gospıtalızatsııa, ınfektsııalyq nemese parazıttik aýrýmen aýyrǵan adammen baılanysta bolǵan adamdardy oqshaýlaý, sondaı-aq ınfektsııalyq nemese parazıttik aýrýǵa kúdikti nemese naqty dıagnozy qoıylǵan adamdardy gospıtalızatsııalaý;
6. Medıtsınalyq ońaltý: TMKKK aıasynda týberkýlezben aýyratyn naýqastarǵa medıtsınalyq ońaltý júrgiziledi;
7. Ýákiletti organ belgilegen aýrýlar tizbesi boıynsha pallıatıvtik medıtsınalyq kómek;
8. Qan jáne onyń komponentterimen qamtamasyz etý; 9. Patologoanatomııalyq dıagnostıka;
10. Ólimnen keıingi donordan aǵzalar men tinderdi alý úshin daıyndaý, olardy alý, konservileý, daıyndaý, saqtaý jáne tasymaldaý.
Sondaı-aq, patsıentterge belgili bir sozylmaly aýrýlar kezinde Densaýlyq saqtaý mınıstrliginiń tiziminde kórsetilgen dárilik zattar men medıtsınalyq buıymdarmen jeńildikti ambýlatorııalyq qamtamasyz etý qoljetimdi.
Eske salaıyq, bul medıtsınalyq qyzmetter azamattarǵa MÁMS júıesindegi mártebesine qaramastan qoljetimdi.
Eger sizge medıtsınalyq kómek kórsetýden zańsyz bas tartsa, árbir emhana men aýrýhanada jumys isteıtin Patsıentti qoldaý qyzmetine júginýge bolady. Onda máseleni ornynda sheshýge kómektesedi.
Eger medıtsınalyq uıym tarapynan túsinistik bolmasa, Áleýmettik medıtsınalyq saqtandyrý qoryna shaǵym túsirýge bolady.
Aıta keteıik, D jáne E sanatyndaǵy adamdar MÁMS sheńberinde medıtsınalyq kómek ala alady.