Medıtsınalyq qyzmet sapasy boıynsha qaıda shaǵymdanýǵa bolady
ASTANA. KAZINFORM — QR Densaýlyq saqtaý mınıstrligi medıtsınalyq uıymdarda qyzmet kórsetý sapasyna shaǵymdar boıynsha túsinik berdi.
«Densaýlyq saqtaý mınıstrligi óziniń baqylaý fýnktsııalary aıasynda, sondaı-aq «Áleýmettik medıtsınalyq saqtandyrý qory» KeAQ kórsetiletin medıtsınalyq qyzmetterdiń sapasy baqylaý men monıtorıngti júzege asyrady. «Ákimshilik quqyq buzýshylyq týraly» kodeksinde medıtsınalyq qyzmetterdiń tártibin, standarttaryn jáne onyń sapasyz kórsetilgeni úshin, sondaı-aq TMKKK jáne MÁMS aıasynda medıtsınalyq kómekti aqyly negizde kórsetkeni úshin ákimshilik jaýapkershilik kózdelgen», - delingen mınıstrliktiń Kazinform agenttigine bergen jaýabynda.
Azamattar Qordyń fılıalyna nemese QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetiniń aýmaqtyq bólimshesine medıtsınalyq uıymdy, emdeýshi dárigerdi kórsete otyryp, sapasyz medıtsınalyq kómek kórsetý faktisi boıynsha júginýge quqyly.
Sonymen qatar, medıtsınalyq uıymdarda patsıentterdi qoldaý jáne ishki aýdıt qyzmeti bar. Máseleni sheshýdi talap etetin túrli jaǵdaılar týyndaǵan kezde, medıtsınalyq sapa boıynsha qyzmettik tergeý júrgizýge jáne patsıenttiń quqyqtary buzylǵan jaǵdaıda sharalar qabyldaý úshin osy qyzmetterge júginýge bolady.
«Áleýmettik medıtsınalyq saqtandyrý qoryna júginip, óz quqyǵyn qorǵaıtyn azamattardyń sany jyl saıyn artyp keledi. Olardyń aryz-shaǵymyna keler bolsaq, byltyr 1414 biryńǵaı baılanys ortalyǵyna, Qoldau 24/7 mobıldi qosymshasyna jáne Qordyń fms.kz saıtyna 26 myńnan astam ótinish-shaǵym kelip túsken. Buǵan keńes alý da kiredi. Kóp kezdesetin suraqtardyń qatarynda medıtsınalyq kómekti sapaly kórsetpeý, medıtsınalyq kómek kórsetýden bas tartý, dári-dármekterdi berýden bas tartý, jalǵan jazbalar, MÁMS aıasynda kórsetiletin qyzmetter boıynsha keńes berý bar. Qor mamandary kelip túsken ótinishter men shaǵymdardy jeke-jeke qaraıdy jáne sheshimin júgingen azamatqa joldaıdy. Qajet bolǵan jaǵdaılarda, jospardan tys monıtorıng jasalady. Onyń nátıjeleri boıynsha faktiler rastalsa, ekonomıkalyq yqpal etý sharalary qabyldanady», - dep atalyp ótken Densaýlyq saqtaý mınıstrligi aqparatynda.
