Medıtsınalyq anyqtamalar tsıfrlyq formatqa kóshedi — Úkimet
ASTANA. KAZINFORM — Jańa jyldan bastap medıtsına salasynda birqatar oń ózgerister júzege aspaqshy. Solardyń biri - densaýlyq saqtaý salasyn tsıfrlandyrý. Bul týraly Úkimettiń baspasóz qyzmeti málim etti.
Sanıtarlyq kitapshalar men medıtsınalyq anyqtamalar tsıfrlyq formatqa kóshedi
Jańa jyldan bastap jeke medıtsınalyq kitapshalar berý, esepke alý jáne júrgizý elektrondy formatqa kóshiriledi. Atalǵan tetikti engizý azamattarǵa qujatty birden birneshe uıymǵa usynýǵa múmkindik beredi, bul olardyń ýaqyty men qarajatyn únemdeıdi. Búginde 1,6 mln-ǵa jýyq qazaqstandyqtyń sanıtarlyq kitapshasy bar.
Ózgerister basqa medıtsınalyq qujattardyń berilýine de áser etti. Sondaı-aq azamattarǵa yńǵaıly bolý úshin qaǵaz túrinen elektrondy formatqa kóshirý josparlanyp otyr:
— Eńbekke jaramsyzdyq paraǵy;
— 075/ý «Medıtsınalyq anyqtama»;
— 026/ý «DKK qorytyndysy»;
— 073/ý «TQ basqarýǵa ruqsat berý týraly anyqtama»;
— 069/ý «Sanatorıı-kýrorttyq karta»;
— 052-2/ý «Bala densaýlyǵy pasporty»
— 076/ý «Qarýǵa ruqsat alý»;
— 038/ý «Eńbekke ýaqytsha jaramsyzdyq týraly anyqtama».
Qazirgi ýaqytta bul maqsatqa jetý úshin aqparattyq júıelerdi ıntegratsııalaý jumystary júrgizilýde. Qujattar úshinshi qolǵa azamattardyń kelisimimen ǵana «eDensaulyq» bóliminde medıtsınalyq derekterge qol jetkizý múmkindigi bar «eGov mobile» qosymshasy arqyly beriledi.
Sonymen qatar jańa jyldan bastap balaǵa ekpe salýǵa ruqsat berý nemese bas tartý da elektrondy túrde tirkeledi. Eger ekpe salynǵan patsıent vaktsınadan keıingi asqynýlarǵa shaǵymdanǵan jaǵdaıda ǵana áreket algorıtmi ózgeredi. Medıtsına tilinde muny ımmýnızatsııadan keıingi jaǵymsyz áserler dep ataıdy. Dáriger dereý kómek kórsetýge, elektrondy habarlama resimdep, ony memlekettik organdarǵa tapsyrýǵa mindetti bolady.
Eske sala keteıik, jańa jyl qarsańynda jádel járdem 27 myńǵa jýyq shaqyrtý boıynsha qyzmet kórsetkenin jazǵan bolatynbyz.