Emshara kabınetterindegi qaýipsizdik: mınıstrlik halyqty saq bolýǵa shaqyrdy
ASTANA. KAZINFORM — Densaýlyq saqtaý mınıstrliginiń málimetinshe, 2024 jyldan bastap 2025 jyldyń I toqsanyna deıin Medıtsınalyq jáne farmatsevtıkalyq baqylaý komıtetine jáne onyń aýmaqtyq bólimshelerine rásimdik medıtsınalyq qyzmet kórsetý sapasyna qatysty azamattardan 7 ótinish túsken.
Osy ótinishterdiń árqaısysy boıynsha jospardan tys tekserýler júrgizilip, kelesi zań buzýshylyqtar anyqtalǵan:
- Tıisti lıtsenzııasyz medıtsınalyq qyzmetti júzege asyrýdyń 4 faktisi;
- Sertıfıkattalǵan mamandarsyz rásimdik qyzmet kórsetýdiń 3 jaǵdaıy;
- Dárilik zattardy saqtaý sharttaryn buzýdyń 2 faktisi.
— Tekserý qorytyndysy boıynsha Komıtettiń aýmaqtyq departamentteri ákimshilik jaýapkershilik týraly hattamalar jasady, salynǵan aıyppuldardyń jalpy somasy 1 mln teńgeden asty, — delingen habarlamada.
Al Jambyl oblysynda qaıǵyly jaǵdaı tirkelýine baılanysty jospardan tys qosymsha tekserýler júrgizilip, dári-dármekter men medıtsınalyq buıymdardy saqtaý qaǵıdalarynyń óreskel zań buzýshylyqtar anyqtalǵan.
— Osy jaǵdaılar boıynsha materıaldar odan ári tergeý úshin quqyq qorǵaý organdaryna berildi. Osy óńirdegi emsharalar kabınetteriniń biri qyzmetin resmı túrde toqtatty, — dep jazdy mınıstrlik.
Jambyl oblysynda búgingi tańda 107 emshara kabıneti jumys isteıdi, onyń 42-si ǵana dárigerge deıingi medıtsınalyq kómekti júzege asyrýǵa lıtsenzııasy bar.
Qoldanystaǵy zańnamaǵa sáıkes jospardan tys tekserýler azamattardyń resmı ótinishteri, memlekettik organdardan (ákimdikterden, densaýlyq saqtaý basqarmalarynan) suraý salýlar nemese quqyq qorǵaý organdarynyń tapsyrmalary bolǵan kezde ǵana júrgizilýi múmkin.
Qazaqstan Respýblıkasy Densaýlyq saqtaý mınıstrligi azamattarǵa qatań túrde kelesideı keńes berdi:
- emsharalyq medıtsınalyq qyzmetterge tek lıtsenzııalanǵan medıtsınalyq uıymdarǵa habarlasý;
- qyzmetkerlerdiń lıtsenzııasy men biliktiliginiń bolýyn naqtylaý;
- tıisti dárigerlik baqylaýsyz úıde medıtsınalyq rásimderdi júrgizýge jol bermeý.
Eske sala keteıik, buǵan deıin elorda turǵyndary qandaı medıtsınalyq kómek túrlerin tegin ala alatynyn jazǵan bolatynbyz.