Medıtsınalyq saqtandyrý qoryna túsken shaǵymdar shamamen 2 esege artqan
Qordyń Nur-Sultan qalasy boıynsha fılıaly taratqan málimetke qaraǵanda, shaǵymdar byltyrǵymen salystyrǵanda shamamen 2 esege kóp túsýde. Kún saıyn bul mekeme 1406 baılanys ortalyǵy, Qoldau 24/7 mobıldi qosymshasy, fms.kz resmı saıty jáne telegram-daǵy @SaqtandyrýBot resmı baılanys arnalary arqyly ótinishterdi qabyldaıdy.
«Taldaý kórsetkendeı, eń suranysy joǵary baılanys tásili - 1406 baılanys ortalyǵy – ótinishterdiń 83 %-y osy qysqa nómir arqyly túsken. Ekinshi orynda – Qoldau 24/7 mobıldi qosymshasy. Qorǵa kóbinese Nur-Sultan, Almaty, Shymkent qalalarynyń, Aqtóbe, Aqmola oblystarynyń turǵyndary júginedi. Ótinishterdiń negizgi bóligi konsýltatıvtik sıpatta bolady. Ótinish berýshilerdiń deni jarnalar men aýdarymdardy qalaı tóleý kerektigin, MÁMS boıynsha medıtsınalyq kómekti alý úshin qandaı kezeńderde tólem júrgizý kerektigin suraıdy», – deıdi qordyń zańdy jáne jeke tulǵalarmen jumys jasaý departamentiniń dırektory Zabıra Orazalıeva.
Jyl basynan beri Nur-Sultan qalasy boıynsha «Klıenttermen qarym-qatynasty basqarý» júıesine 1891 ótinish túsken. Munyń 1-jelisi arqyly túsken 829 ótinishtiń 764-i «jumys istemeıtin júkti áıelder» jáne «orta, tehnıkalyq jáne kásiptik, orta bilimnen keıingi, joǵary bilim berý, sondaı-aq joǵary oqý ornynan keıingi bilim berý uıymdarynda kúndizgi oqý nysanynda bilim alatyn adamdar» sanatyndaǵy jeńildigi bar azamattardan ýaqytsha mártebe berý týraly túsken ótinimder. Budan basqa «ShOB úshin saqtandyrý mártebesin túzetýge» 65 ótinim túsip, óńdeldi.
Qor ókilderi atap ótkendeı, birinshi toqsanda 5,5 myń shaǵym túsken. Patsıentter medıtsınalyq kómektiń sapasyz kórsetilýine nemese odan bas tartylýyna, konsýltatsııalyq-dıagnostıkalyq qyzmetterdi uzaq kútýine, tar beıindi mamandarǵa jazbanyń bolmaýyna shaǵymdanǵan.
«Shaǵymdardyń negizgi sebepteri – taǵaıyndalǵan emmen, qoıylǵan dıagnozben kelispeý, dárigerdiń medıtsınalyq qyzmetterge joldama berýden bas tartýy, beıindi dárigerdiń konsýltatsııasyn nemese dıagnostıkalyq tekserýdi kútý, óńirde qajetti mamandardyń bolmaýy. Qor ár shaǵym boıynsha egjeı-tegjeıli taldaý júrgizýde. Biz patsıentterdi óz quqyqtaryn bilýge jáne quqyqtary buzylsa, jaǵdaıdy sol jerde sheshý úshin aldymen medıtsınalyq uıymnyń ózinde Patsıentterge qoldaý kórsetý qyzmetine júginýge shaqyramyz. Bul qyzmetter barlyq emhanalar men aýrýhanalarda bar. Eger máseleni sol jerde sheshý múmkin bolmasa, qorǵa júginý qajet», – dep atap ótti Zabıra Orazalıeva.