Medıtsınalyq-áleýmettik mekeme qamqorlyǵyndaǵy adamdy týystary kameramen onlaında baqylaıdy
Mınıstrlik medıtsınalyq-áleýmettik mekemelerdiń jumysyn jetildirý boıynsha sharalar keshenin ázirledi. Eńbek jáne halyqty áleýmettik qorǵaý vıtse-mınıstri Erlan Áýkenov oblystardyń jáne respýblıkalyq mańyzy bar qalalardyń ákimderi orynbasarlarynyń qatysýymen beınekonferentsııa baılanysy rejıminde ótken jumys keńesinde tıisti usynymdar men tapsyrmalar berdi.
«Jergilikti atqarýshy organdardyń qaramaǵyndaǵy MÁM bólimderine qaraıtyn adamdardyń quqyqtarynyń buzylý faktileri keń qoǵamdyq rezonans týdyrdy. Aıagóz balalar arnaýly áleýmettik qyzmet kórsetý ortalyǵynyń 4 tárbıelenýshisi qaıtys boldy, Aqmola oblysyndaǵy qarttar úıinde ólimmen aıaqtalǵan koronovırýstyń órshýi, Túrkistan oblysyndaǵy psıhonevrologııalyq aýrýlary bar balalarǵa arnalǵan ortalyqta qamqorlyqtaǵylarǵa qatygezdikpen qaraý sııaqty birqatar júıeli problemalar anyqtaldy», delingen habarlamada.
Osyǵan baılanysty ýákiletti memlekettik organdar QR Bas prokýratýrasymen birlesip 136 memlekettik MÁM-ge keshendi tekserý júrgizedi.
«Budan basqa, jaqyn arada oblys ákimderiniń orynbasarlarymen birge mekemelerdiń jumysyn azamattyq belsendiler, jýrnalıster, qoǵamdyq qozǵalystardyń ókilderi qadaǵalaıdy. Qamqorlyqtaǵy adamdardyń ómir súrý sapasyn jaqsartý úshin qoldanystaǵy zańnamaǵa ózgerister engizý josparlanýda.
MÁM janynan qoǵamdyq keńester qurylady, olardyń quramyna qamqorlyqtaǵy adamdardyń týystary men jaqyndary, bedeldi salalyq sarapshylar, ákimdikter janyndaǵy qoǵamdyq keńesterdiń músheleri, ÚEU ókilderi kiredi. Olar qyzmet alýshylardyń quqyqtarynyń saqtalýyn, onyń ishinde qolma-qol aqshany baqylaý shottaryndaǵy qarajattyń jumsalýyn baqylaıtyn bolady», delingen habarlamada.
Barlyq MÁM týraly aqparat Áleýmettik qyzmetter portalynyń derekqoryna engiziledi.
«Múgedektigi bar adamdardy áleýmettik qorǵaý» portalynda (inva.gov.kz) keri baılanysy bar mekemelerdiń reıtıngi jasalatyn bolady, onda árbir adam MÁM qyzmeti týraly pikir qaldyra alady. Budan basqa, qyzmet alýshylarǵa ınternetke qoljetimdilik qamtamasyz etiledi.
«Barlyq mekemelerdi beınekameramen jabdyqtaý josparlanyp otyr, olar arqyly qamqorlyqtaǵy adamdardyń týystary bolyp jatqan oqıǵalardy onlaın rejımde baqylaı alady.
Sondaı-aq, ǵımaratty jóndeý jáne ońaltý jabdyqtaryn, arnaıy kólikti jańartý josparlanǵan. Jergilikti atqarýshy organdarǵa shalǵaı aýdandardaǵy mekemelerdi iri qalalar men oblys ortalyqtaryna kóshirý usynyldy. Áleýmettik qyzmetkerlerge ortalyq qyzmetkerlerine kómek kórsetetin volonterler bekitiledi», delingen habarlamada.
Qabyldanyp jatqan sharalardyń kóbisi halyqaralyq tájirıbede standartty bolyp tabylatynyn aıtyp ótken jón. Mysaly, áleýmettik qyzmetterdiń sapasyn damytý men baqylaýǵa qoǵamdyq qatysý Ulybrıtanııada, Danııada, Germanııada, Frantsııada, AQSh-ta bar.
Qarjylyq eseptiliktiń ashyqtyǵy Aýstralııa, AQSh-tyń jáne Eýropa elderiniń korporatıvti sektorynda keńinen taralǵan.
QR Eńbek jáne halyqty áleýmettik qorǵaý mınıstrligi jaqyn arada tıisti normatıvtik-quqyqtyq aktilerge qajetti ózgerister engizýdi josparlap otyr.
Esterińizge sala keteıik, qazirgi ýaqytta 931 uıym arnaıy áleýmettik qyzmetterdi kórsetedi. Sonyń ishinde 136 memlekettik MÁM bar, olarda 36 myń adam turady. Ómirlik qıyn jaǵdaıda júrgen 8 sanattaǵy azamattar kórsetiletin qyzmetti alýshylar bolyp tabylady.
