Medıtsına týrızmi: Sheteldik naýqastar qaı baǵytta em alýǵa keledi

ASTANA. QazAqparat – QR Densaýlyq saqtaý mınıstrligi Medıtsınalyq kómekti uıymdastyrý departamenti sheteldik naýqastar arasynda tanymal medıtsına qyzmetterin atady, dep habarlaıdy QazAqparat.

Aıta keteıik, ótken jyly elimizdiń medıtsınalyq uıymdarynda 3884 sheteldik patsıent emdelgen, olardyń ishinde 85% (3303 adam) shuǵyl jáne 15% (581 adam) josparly tártippen túsken.

«Bul úshin elimizde túrli ınnovatsııalyq tehnologııalar engizilýde. 2021 jyly «Ulttyq neırohırýrgııa ortalyǵy» AQ bazasynda Ortalyq Azııa elderinde alǵashqylardyń biri bolyp gamma-pyshaq ortalyǵy ashyldy, ol ortalyq júıke júıesiniń aýrýlaryn radıohırýrgııalyq emdeýdiń «altyn standarty» bolyp sanalady. Gamma-pyshaq radıohırýrgııalyq qondyrǵysy iske qosylǵan 2021 jylǵy 27 mamyrdan beri 750-den astam ota jasaldy. Oǵan qosa, Ulttyq ǵylymı onkologııa ortalyǵy salynyp jatyr, onda proton, radıonýklıd, lazerlik terapııa ortalyqtaryn ashý josparlanǵan», - dep jazylǵan departament habarlamasynda.

Medıtsınalyq týrızm salasynyń aǵymdaǵy jaı-kúıin baǵalaý Qazaqstanǵa emdelýge keletin sheteldik azamattarda neırohırýrgııa, kardıohırýrgııa, transplantologııa, reprodýktologııa (EKO), ortopedııa jáne travmatologııa, stomatologııa baǵyttary suranysqa ıe ekenin kórsetedi.

«Jalpy Densaýlyq saqtaý mınıstrligi Qazaqstanda medıtsınalyq týrızmdi damytý bastamany qoldaıdy. Jyljymaly medıtsınalyq týrızmdi odan ári damytý jumystary 2023 jylǵa arnalǵan sharalar jospary boıynsha jalǵasady», - deıdi Medıtsınalyq kómekti uıymdastyrý departamenti.

Qazaqstandyqtar ótken jyly bıýdjet qarajaty esebinen Túrkııa, Reseı, Germanııaǵa em alýǵa jiberilgen.