«Medeý» muz aıdyny modernızatsııadan ótedi

ALMATY. KAZINFORM — Almaty ákimi Erbolat Dosaev demalýshylar sanynyń artqanyn eskere otyryp, «Medeý» muz aıdynynyń jaǵdaıyna baǵa berdi.

Ákim «Medeý» Almatynyń eń tartymdy oryndarynyń qatarynda qala beretinin aıtty. Qala turǵyndaryna, qonaqtarǵa, týrısterge arnalǵan oryn. Jyl basynan beri munda 400 myń adam keldi.

— Biz byltyr onyń tehnıkalyq jaǵdaıyna aýdıt júrgizdik. Onyń nátıjesi muz aıdynynyń qalypty rejımde jumys isteı alatynyn kórsetti. Budan bólek, bul nysannyń modernızatsııa kontseptsııasyn bekittik. Qazir ony jobalaýdy bastaımyz. Muz jasaý júıesi jańartyldy, endi «Medeýdiń» ınjenerlik jáne basqa da ınfraqurylymyn jańartý qajet, — dedi Erbolat Dosaev.

Aıtýynsha, muz aıdynyna barǵysy keletinder úshin arnaıy kameralar ornatylǵan, bul demalýshylarǵa adamdar az ýaqytty tańdaýǵa múmkindik beredi.

— Árıne, 2 qarashada muz aıdyny ashylǵanda ádettegideı kóp adam — jastar men stýdentter keldi. Qazir jaǵdaı birshama jaqsardy, turǵyndar profılaktıkalyq sharalar júrgiziletin kúnnen basqa kez kelgen jumys kúni kelýge bolatynyn biledi. «Medeý» Almatynyń maqtanyshy ári sımvoly bolyp qala beredi dep oılaımyn, — dedi Dosaev.

Eske salaıyq, «Medeý» muz aıdynynda konkımen syrǵanaý maýsymy 2 qarasha kúni ashyldy.