«Medeý» muz aıdyny qalaı jańartylady
ALMATY. KAZINFORM – «Medeý» muz aıdynynyń aınalasynda jańa alleıalar men serýendeýge arnalǵan joldar paıda bolady.

Almaty sport nysandaryn basqarý jónindegi dırektsııasynyń málimetinshe, 2023 jyly «Medeý» muz aıdyny men onyń ınjenerlik jelileriniń tehnıkalyq jaǵdaıyn tekserý jáne baǵalaý jumystary júrgizildi. Saraptama qorytyndysyna sáıkes, qazirgi ýaqytta muz aıdyny jappaı syrǵanaý úshin qaýipsizdik talaptaryna saı keledi.
Almaty ákimdigi «Medeý» aýmaǵyn jańǵyrtý boıynsha birqatar jumystar júrgiziletinin habarlady. Olar:
- muz aıdynynyń batys bóliginde serýendeý alleıasyn qurý
- aıdyn aınalasynda jaıaý júrginshilerge arnalǵan baspaldaqtar ornatý
- ońtústik betkeıde, ıaǵnı Esentaı ózeniniń oń jaǵalaýy boıymen kórkeıtý jumystaryn júrgizý
- múmkindigi shekteýli azamattarǵa yńǵaıly bolýy úshin ońtústik-shyǵys jáne ońtústik-batys bóliginde eki jedel saty ornatý kózdelgen.
Odan bólek ınjenerlik júıelerdi jańǵyrtý jumystary barysynda muz jabynyn sýytý júıesin jańartý, qubyr jelilerin tolyq aýystyra otyryp, tehnologııalyq taqtany jańartý, jylytý júıesin gazǵa aýystyrý, jylytý jáne kórermenderge arnalǵan oryndardy jylytý júıesin jańǵyrtý jáne kelýshilerge qolaıly jaǵdaı jasaý úshin ınfraqurylymdyq elementterdi jańartý jumystary josparlanǵan. Sonymen qatar «Medeý» qonaq úıin tolyq rekonstrýktsııalaý jobaǵa engen.
- Rekonstrýktsııalaý barysynda «Medeý» muz aıdynynyń tarıhı kelbeti men mádenı murasyn saqtaý basty basymdyq bolyp qala beredi, - dep habarlady ákimdikten.
Eske salaıyq, ótken jyly Almaty ákimi Erbolat Dosaev «Medeý» muz aıdyny modernızatsııadan ótetinin aıtqan bolatyn.