Májilis zań qabyldady: Qazaqstanda nesıeni esepten shyǵarýdyń jańa talaptary aıqyndaldy

ASTANA. KAZINFORM — Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine qarjy naryǵyn damytý jáne qarjylyq kórsetiletin qyzmetterdi tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań qabyldandy.

Bul qujat Parlament Májilisine 2024 jylǵy 9 qańtarda engizilip, 2024 jylǵy 16 qazanda birinshi oqylymda maquldandy.

Qarjy naryǵyn retteý jáne damytý agenttigi tóraǵasynyń orynbasary Oljas Qızatovtyń aıtýynsha, qoldanystaǵy norma boıynsha alaıaqtardyń kesirinen rásimdelgen nesıelerdi esepten shyǵarý tek sot sheshimimen júzege asady. Búgin qabyldanǵan zańda sotqa deıingi esepten shyǵarýdyń jańa negizderi usynyldy. Máselen, kredıt alýǵa alǵash ret júgingen azamattardyń bank bólimshesinde nemese mıkroqarjy uıymynda mindetti túrde óziniń qatysýy boıynsha talaby engizildi.

Sonymen qatar, kepilsiz onlaın-kredıtterdi berý kezinde «salqyndatý» kezeńi (jıyrma tórt saǵat) eskerilgen, ıaǵnı osy 24 saǵat ishinde qaryz alǵan adamǵa osy nesıeden bas tartýǵa múmkindik beriledi.

Onyń sózine qaraǵanda, azamattardyń jekelegen sanattaryna, ıaǵnı nesıe berýge qosymsha kelisim alýǵa tıisti talaptar belgiledi. Bul talaptar buzylǵan jaǵdaıda, bankter nemese mıkroqarjy uıymdary sotqa deıin bul nesıelerdi esepten shyǵarýy kerek.

— Sonymen qatar, zań aıasynda bankter nemese mıkroqarjy uıymdary bıometrııalyq sáıkestendirý rásimin buzǵanda, klıenttiń jeke basyn kýálandyratyn málimetterdi zańsyz paıdalanǵan jaǵdaıda, qaryzdy sot tártibimen esepten shyǵarý negizderi keńeıtildi, — dedi agenttik ókili.

Bul rette, osy kemshilikter anyqtalsa, onda bankter mundaı kredıtterdi esepten shyǵarýy tıis.

Májilistiń Qarjy jáne bıýdjet komıtetiniń málimetine qaraǵanda, tutynýshylardyń quqyqtaryn qorǵaý jáne azamattardyń boryshtyq júktemesin azaıtý maqsatynda:

— merzimdi qyzmetti ótkerý kezeńinde áskerı qyzmetshilerge kredıtter men mıkrokredıtter berýge tyıym salýdy engizýdi;

— halyqtyń áleýmettik osal toptaryna jatatyn azamattarǵa, sondaı-aq tótenshe jaǵdaı engizý saldarynan zardap shekkenderge qaryzdar men mıkrokredıtter boıynsha keminde 3 aı merzimge mindetti túrde keıinge qaldyrýdy, sondaı-aq aı saıynǵy tólemdi 50 jáne odan da kóp paıyzǵa tómendetýdi;

— banktik qaryzdardy ishinara ne merziminen buryn ótegeni úshin qaryz alýshy-jeke tulǵalardan turaqsyzdyq aıybyn óndirip alýdy bolǵyzbaýdy;

— tutynýshylardyń keri baılanysty ýaqtyly alýy úshin qarjy uıymdarynyń klıentterdiń ótinishterin qaraý merzimin 15 jumys kúni ishinde dep belgileýdi;

— memlekettik bıýdjetten tólenetin tólemderdi jáne tabıǵı nemese tehnogendik sıpattaǵy tótenshe jaǵdaı saldarynan zardap shekken azamattarǵa arnalǵan qaıyrymdylyq uıymdarynan túsken aqshany úshinshi tulǵalardyń óndirip alýynan qorǵaýdy;

— banktik qaryz nemese mıkrokredıt sharttary boıynsha saqtandyrý agenti komıssııasynyń shekti mólsherin 10% sheginde belgileýdi;

— «Otbasy bank» AQ-na memlekettik bilim berý jınaqtaý júıesi sheńberinde bilim berý kredıtterin berý quqyǵyn berýdi;

— qarjy uıymdarynyń ulttyq standartty eskere otyryp, múgedektigi bar adamdarǵa qyzmet kórsetý rásimderin, onyń ishinde senim bildirilgen tulǵa arqyly belgileýin kózdeıtin túzetýler engizdi.

Budan buryn habarlanǵandaı, endi syrqattanyp qalǵandar men jumysynan aıyrylǵandar nesıesin keıinge shegere alady.