Májilis metall synyqtary men qaldyqtarynyń aınalymyn retteıtin zań jobasyn maquldady
ASTANA. KAZINFORM — Májilis mashına jasaýdy damytýǵa arnalǵan zań jobasyn birinshi oqylymda maquldady.
— Zań jobasy mashına jasaý jáne jalpy ónerkásipti damytý salasyndaǵy kelesi máselelerdi qamtıdy, — dedi qujatty tanystyrǵan depýtat Aıtýar Qoshmambetov.
Qujatta arnaıy ekonomıkalyq aımaqtyń qatysý talaptaryna qaıtalanatyn óndirister men suranysy joq ónim óndirisin boldyrmaıtyn norma engizý kózdelgen. AEA áleýetti qatysýshylary úshin krıterııler engizýge baǵyttalǵan.
— «Aýmaqtyq klaster» uǵymyn «ónerkásiptik klaster» uǵymymen aýystyryp, geografııalyq shoǵyrlaný krıterııin alyp tastaý usynylady. Bul jańashyldyq óndiristeri eldiń ártúrli óńirlerinde ornalasqan mashına jasaý kásiporyndaryna ónerkásiptik klasterlerge birigýge jáne óz óndirisinde el ishindegi qundylyqty damytýǵa múmkindik beredi, — deıdi depýtat.
Aıtýar Qoshmambetov zań jobasyna el ishindegi qundylyqty damytý jáne óndiristi jergiliktendirý deńgeıin tereńdetý jónindegi qarsy mindettemeler engizilgenin aıtty.
— Bul norma otandyq taýar óndirýshilerdi qoldaýǵa jáne joǵary qosylǵan quny bar ónim óndirisin yntalandyrýǵa baǵyttalǵan. Tústi jáne qara metaldardyń synyqtary men qaldyqtaryn jınaý, saqtaý, qaıta óńdeý jáne ótkizý jónindegi qyzmetti retteıtin jáne osyndaı qyzmetti júzege asyratyn zańdy tulǵalardyń mindetteriniń tizbesin aıqyndaıtyn norma kózdelgen, — dedi ol.
Aıta ketý kerek, Qazaqstanda metall synyqtary men qaldyqtaryn áketýge tyıym engizilgen.
