Májilis IKAO-ǵa qatysty qujatty qabyldady

ASTANA. KAZINFORM – Búgin Parlament Májilisiniń jalpy otyrysynda «Halyqaralyq azamattyq avıatsııa týraly konventsııanyń 50 a)-babynyń ózgerýine qatysty hattamany jáne Halyqaralyq azamattyq avıatsııa týraly Konventsııanyń 56-babynyń ózgerýine qatysty hattamany ratıfıkatsııalaý týraly» Zań qabyldandy.

Qujat Qazaqstan Respýblıkasynyń Halyqaralyq Azamattyq avıatsııa uıymy (IKAO) organdarynyń quramynda ókildigi týraly máseleni ilgeriletý, sondaı-aq Respýblıkanyń halyqaralyq arenadaǵy ımıdjin jaqsartý úshin qolaıly jaǵdaılar jasaýǵa baǵyttalǵan.

- Osy ózgerister arqyly Halyqaralyq Azamattyq avıatsııa uıymy (IKAO) Keńestiń quramyn 36-dan 40 memleketke deıin jáne Aeronavıgatsııalyq komıssııanyń quramyn
19-dan 21 múshege deıin arttyrady. IKAO Keńesi — bul IKAO Assambleıasymen 3 jyl merzimge saılaıtyn atqarýshy organ. Ol halyqaralyq standarttardy bekitedi, IKAO-nyń qazirgi qyzmetine basshylyq jasaıdy, memleketter arasyndaǵy daýlardy qaraıdy jáne Assambleıa sheshimderiniń oryndalýyn baqylaıdy. Aeronavıgatsııalyq komıssııa — bul ushý qaýipsizdigi, áýe qozǵalysyn uıymdastyrý jaýapty tehnıkalyq organ. Bul IKAO-nyń organdarynyń músheleriniń sany 30 jyldan astam ózgermegen. Osy ýaqytta IKAO-ǵa kirgen memleketterdiń sany 160-tan 193 -ke deıin kóterildi. Osyǵan baılanysty IKAO músheleri óz memleketterinde ratıfıkatsııany ótkizý kerek, - dedi QR Kólik mınıstri Nurlan Saýranbaev.

Onyń sózine qaraǵanda, búginde bul qujattardy Ulybrıtanııa, Frantsııa, Sıngapýr, jáne basqa da elderdi qosa alǵanda, 120 memleket ratıfıkatsııalaǵan.

- Hattamalardy ratıfıkatsııalaý bıýdjet qarajatyn jumsaýdy qajet etpeıdi, - dedi mınıstr.

Eske salsaq, Halyqaralyq Azamattyq avıatsııa uıymy (IKAO) 2025 jylǵy 30 tamyzdan 15 qyrkúıekke deıin Qazaqstan Respýblıkasynda ótkizilgen avıatsııalyq qaýipsizdiktiń keshendi aýdıtiniń (USAP-CMA) nátıjelerin resmı túrde jarııalady.