Májilis depýtaty jekemenshik mektepterdiń problemasyn atady
ASTANA. KAZINFORM – Búgin Parlament Májilisiniń jalpy otyrysynda depýtat Juldyz Súleımenova jekemenshik mektepterdegi máseleni kóterdi.
«Búgingi saýalda jekemenshik mektepterge memlekettik tapsyrysty ornalastyrýdyń birqatar máselesine toqtalǵym keledi. Birinshiden, memlekettik tapsyrysty ornalastyrý mehanızmin qaıta qaraý qajet dep sanaımyz. Sebebi, qazirgi júıede ár balaǵa arnalǵan qarjy Jalpy sıpattaǵy transfertter (TOH) boıynsha qarastyrylady. Alaıda, qandaı da bir sebeptermen jekemenshik mektepterge bólinetin qarajat respýblıkalyq bıýdjetke júktelgen, al óńirlerdegi balalar sany ózgerissiz jergilikti atqarýshy bılik organdarynda, ıaǵnı bilim basqarmalarynda qalyp otyr. Bul degenimiz, óńirlerde balalardy memlekettik mektepterden jekemenshik mektepterge aýystyra otyryp, qarjyny ózderine qaldyryp otyr. Mundaı jaǵdaıda qarjynyń ádil bólinýin qamtamasyz etý úshin jańa mehanızmdi engizý qajet», - dedi J. Súleımenova Úkimet basshysynyń orynbasary Tamara Dúısenovanyń atyna joldaǵan saýalynda.
Onyń aıtýynsha, barlyq balalar teń dárejede sapaly bilim alýyna múmkindik qarastyrylyp, jekemenshik mektepterde memlekettik tapsyrys balalardyń oqýlyǵyn jáne ystyq tamaqpen qamtylýy problemasyn sheshýge baǵyttalýy tıis.
Memlekettik bilim berý tapsyrysy 677 jekemenshik mektepte 251,3 myń oqýshyny qamtyp, 2024 jyly respýblıkalyq bıýdjetten 133,9 mlrd teńge kóleminde qarajat bólindi. Alaıda, 2024 jyldyń 1 tamyzyndaǵy jaǵdaı boıynsha bul somanyń 103,5 mlrd teńgesi ıgerilgen, qalǵan 30,4 mlrd teńge tek 1 aıǵa qarjylandyrýǵa jetkilikti. 2024-2025 jylǵa jekemenshik mektepterge qosymsha qarajat bólý máselesi Respýblıkalyq bıýdjettiń naqtylaýy bolmaǵandyqtan, sheshilmeı tur.
«2023 jyldyń qorytyndysy boıynsha 1,4 mlrd teńge kóleminde kredıtorlyq qaryz bar. Bul máseleni sheshý úshin 2024 jyldyń qańtarynda qosymsha qarajat bólýge ótinim daıyndalǵan, áli kúnge deıin sheshim qabyldanbady. Budan bólek, jekemenshik mektepterde de bilim sapasy, muǵalimderdiń kásibı biliktiligi, tártibi men tárbıesin qadaǵalaıtyn júıe bolýy qajet. Mundaı júıe oqýshylardyń jan-jaqty damýyna, bilim alý deńgeıiniń joǵary bolýyna, sondaı-aq muǵalimderdiń kásibı ósýine yqpal etedi. Jekemenshik bilim berý mekemeleri de memlekettik mektepter sııaqty sapaly bilim berýge jáne urpaq tárbıeleýge jaýapty ekenin eskerý qajet. Keıingi tórt jylda jekemenshik mektepter ashý úshin kóptegen ınvestor ekinshi deńgeıli bankterden zaemdyq qarajat tartqan, jekemenshik mektepter elimizdegi 3 aýysymdy mektepter problemasyn sheshýde aıtarlyqtaı kómek boldy», - dedi depýtat.
